Shillong:U Conrad Sangma, myntri rangbah ka Jylla, ula plie ia ka jaka ai jinghiai halor ka kam ri jingri ha Manai, Mairang, West Khasi Hills District, ha kaba la don lang, U bah Prestone Tynsong, myntri rangbah ba ar ka Jylla, ha ryngkat U bah Metbah Lyngdoh myntri ka tnat pynneh um jong ka sorkar Jylla.
Haba kren ha ka jingialang, U Conrad, ula pynsngew ba ki nongri jingri, ki dei ban shim ia katei ka lad, na ka bynta ki rukom ai jinghikai kiba la pynkhreh da katei ka jaka ai jinghikai.
“Kin don shibun ki briew, kiba pyrkhat ia kaei ka ban jia ia ka lashai jongki, hadien ba ki la pyndep ia ka jingshah hikai ri jingri, hynrei nga kwah ban iathuh iaphi ba ka tnat ri jingri, ha ka jing ialam jong U Deputy Chief Minister, ka dang pynkhreh ia ki lad ki lynti ban iarap ia kito ki ban pyndep ia katei ka jingshah hikai jongki. Nga don hangne, ba nga kwah ban iathuh, ba kam dei ba ngi shu plie ia kane ka iing, hynrei ngi don ia ka jingkut jingmut ba ki briew jongngi, kin ioh ia ka kamai kajih” ong u myntri rangbah.
U myntri rangbah, ula pynsngew ruh halor ka jingdonkam ban peit ia ka jingduna ki nongtrei ha katei ka tnat, ha kaba ka la pyndkoh ia ka jingtreikam jong kiba kum kitei ki jaka hikai ha ka Jylla.
U Conrad, u ong ba 70 percent na ka ioh ka kot ka Jylla, ka shaniah ha ka rep bad ka ri jingri bad kumta ka donkam ban pynkhlain ia katei ka lain, na ka bynta ban plie ia ki lad ioh kam ioh jam.
U myntri rangbah, ula iathuh ruh ba ka Meghalaya, ka hap ban thied na shabar ia 50 percent ka doh bad kumta, u ai jingmut ia ki nongri jingri ba kin shim ia katei ka lad ban pynbun ia ka jing pynmih doh.
“Ka jingdokam doh ha ka Jylla, ka long 50000 metric tonne bd mar shiteng na katei ka wan na shabar ka Jylla bad ka don ka lad ia ki nongri jingri ha ki nongkyndong, ba kin pynmih bun ia ka doh” ong u myntri rangbah.
U Conrad, u pynsngew ruh halor ka jingdonkam ban pynmih ia ka doh kaba bha, ha kaba yn lah ban shalan sha ki bynta jong ka ri bad wat shabar jong ka Jylla ruh kumjuh bad kaba dei ruh ka lad ban ai lad ha ka ioh kam ioh jam sha ki nongkyndong. U myntri rangbah, ula iathuh ruh ba ka sorkar Jylla, kan pyntreikam noh shen ia ka organic milk mission, na ka bynta ban nang pynkhraw ia ka kam pynmih dud ha ka Jylla.