Yn pynthymmai nongkitkam ka Synjuk ki Rangbah Shnong Ri Bhoi

Nongpoh: Haba kren sha ki lad pathai khubor hynnin ka janmiet, ki nongialam ka Synjuk ki Rangbah Shnong Ri Bhoi District, kiba kynthup ia u bah Rocky Kylla kum u Chairman, nangta u bah CB Syiem, General Secretary lem bad kiwei, ki la ong ba katei ka Synjuk kan sa pynlong ia ka General Meeting ha ka 29 tarik mynta u Bnai naduh ka por 11 baje mynstep ha Umsning Auditorium Hall bad ha katei ka jingialang, yn sa jied bad ban pynthymmai ia ki nongialam ba thymmai ka Synjuk.

U bah Rocky Kylla bad u Bah C.B Syiem, ki la ong ba katei ka sngi kan dei ka jingialang bah bad kaba dei ruh ka sngi kaba baroh ki nongialam shnong kin ioh ban iakynduhlang, kata na ka bynta ban jied ia ki nongialam ba thymmai bad nalorkata, kan sa don ruh ka jingiakren halor shibun ki mat, la ka long ban nangpynkhlain shuh shuh ia ka Synjuk lem bad kiwei ki kam kiba iadei halor ka roi ka par hapoh ka Distrik lem bad shibun ki mat kiba iadei bad ka im ka iap jong ka jaidbynriew.