Yn pynsngew ki ar seng ia ka bamsap u CEM

Shillong, 19 Rymphang:
Ha ka 21 tarik mynta u bnai ha ka por 12 baje mynsngi ki ar tylli ki seng bhalang ha Jaintia Hills ba kynthup ia ka Jaintia Student Union (JSU) bad ka Jaintia Youth Federation (JYF) kin pynlong ia ka jingialang paidbah ha Iawmusiang, na ka bynta ban pynsngew paidbah halor ka jingbam sap u CEM ka JHADC u Madon Rymbai kumba la kynnoh ba u la sei tuh ia ka pisa kaba la kot sha ka T.1.18 klur tyngka ha ka kyrteng jong ki nongioh jingmyntoi.
Ki ar seng ki la kyntu ia ki paidbah ba kin ia mih ryntih ban poi sha katei ka jingialang, kumjuh ruh ia ki nongialam sengbhalang bapher bapher ba kin ia wan, da ka jingsngewkhia na ka bynta ka iap ka im jong ka Ri bad ka Jaitbynriew kaba la ktah mationg ia ka burom ka ijot jong ka Jaintia Hills hi baroh kawei, ha kaba la kynnoh pyndonkam bakla ia ka pisa ki paidbah.
“Namar ka ain kalong kumjuh ia baroh, ym don Heh ne Rit, ki bor jong ka ain ki dei ban da shim khia bha ban pynsted ia ka jingtohkit khnang ba ki paitbah jong ka Jaintia Hills kin ioh ia ka jingbishar ka ba hok bad khuid kaba pynhun lang ia baroh khlem da niew shilliang ia u ba duk bad uba u riewspah” ong u Ma P.L Majaw President ka JYF Sengkmie.