Yn pynshai paidbah ia ki Misteri Nongbylla sngi

Shillong, 02 Jylliew:
Ka District Labour Office, East Khasi Hills ha ryngkat ka jingiatrei lang bad ka Mawlai Town Dorbar bad ka Seng Samla Mawlai kan pynlong ia ka jingpynshai paidbah ha Indoor Sports Hall, Mawlai Mawdatbaki ha ka 6 tarik u Jylliew naduh ka por 8 baje mynstep.
Ka jingthmu jong katei ka jingialang ka long ban pynshai paidbah ia ki jingmyntoi jong ki Misteri Nongbylla Sngi (shna Ing/surok) lada kin long ki dkhot jong ka Meghalaya Building & Other Construction Workers Welfare Board ha ka ba kin ioh ia ki jingiarap ha ki liang bapher bapher.
Kitei ki jingmyntoi kin long ka baibam tym men, ka jingsiew haba iap bad ka bailut baisep ha kaba tep, ka jingiarap bai dawai haba thiah hospital, ka jingiarap haba aksiden ne mynsaw ha ki jaka trei, ka jingiarap ia ki khun haba pule, ka jingiarap haba iathoh shongkurim, ka jingiarap ia ki long kmie ha ka por ba ioh khyllung, ka jinghikai ban ioh jingtbit ha ki kam ki jam bad kiwei.
Ka tnad ophis ka kyntu ia baroh ki nongtrei bylla sngi ban wan khang sha katei ka jingialang. Ki jingdonkam haba rung dkhot kin long ar tylli ki dur Passport, ka Xerox EPIC lane ka Birth Certificate, ka kot jingpyn shisha na u nongaikam lane ka certificate na u SDO PWD/PHE ha ka jingsiew kaba long T.25 /- ka bai pynrung kyrteng bad T.30/- na ka bynta u synniang ba man u bnai.