|
Shillong: Ka seng ba thymmai jong ki samla kilan met ka jylla ïa kaba la tip kum ka Meghalaya Strongman and Amateur Power Sports Association (MSAPSA) kan pynlong ïa ka jingïakob rah nar, na ka bynta ki kynthei bad shynrang.
 Ïa kane la ïathuh da u samla Balaphrang Kharshiïng, u Organizing Secretary cum Promoter jong ka MSAPSA, ha ka jingïa kynduh lang bad ki lad pathai khubor hapoh Shillong Press Club hynne ka sngi ka 22 tarik u Jymmang 2019.
Ka seng MSAPSA, ka hap hapoh ka shatri jong ka Strongman Corporation of India (SCI), bad kadei ka seng kaba heh duh na bynta ka jingïakob tynjuh bor.
Ïa ka jingïakob yn pynlong ha ka 15th u Jylliew 2019, ha madan Fifth Ground lane ka Dalang Ground, Polo, ha kaba yn don shibun jait ki jingïalehkai ki ban pynbyrngia ruh ïa ki nongwan peitkai bad ki nongkyrshan kum ki kmie ki kpa lane ki hynmen ki para jong ki nongïashim bynta ba kin ïa pyrshang hi dalade.
U samla Balaphrang Kharshiïng u la ong ba kane ka jingpyni bor kam dei ka sport, “hynrei kadei tang na ka bynta ka bor, ha kaba la mang katkum ka jingkhia jong ki nongïashim bynta.”
Kane ka seng ka long dkhot ruh bad ka Arnold World Strongman World Championship.
Haba bynrap halor kane ka phang, i kong Jessica Bamon, iwei na ki dkhot jong kane ka kynhun, iba long ruh ka 1st Lady Bouncer na kane ka thaiñ Shatei Lam Mihngi, bad ka Miss Best Physique 2017, ila ong, “Kane ka jingïalehkai kam long kaba rem kum kiwei, bad ym donkam ban phikir bam, ban dih dawai, lane ki supplement, hynrei tang ka bor met, kumta ngi kyrmen ba yn lah ban kyntiew ïa kane ka sport ha kanr ka thaiñ.”
“Ha ka por ba nga shim ïa ka sienjam ban shim bynta ha kane ka jingkilan met, ngam shym la tip shano kan ïalam hynrei ka la long ka jingmyntoi ïa nga mynta,” la ong i kong Bamon haba i kyntu ïa kiwei ba kin ïashim bynta ha kane ka sport, “Kumta nga kyrmen ba kiwei kin ïoh ka jingtbit na kane.”
Ki jingïakob ki ban don ha katei ka sngi ki long na ka bynta ki kynthei, ka Car Pull, Farmers Work, Front Plate Hold, and One Arm Dumbbell Press, bad na ka bynta ki shynrang, ka Car Pull, Car Dead Lift, Farmers Work, Crucifix, One Arm Dumbbell Press,
Na bynta kane, ka seng kan sa ai ïa ki registration form ha ka dor T 500 kawei kaba long ruh kum ka jinglong dkhot jong ka MSAPSA.
Ki nongjop kin ïoh da ki trophy bad ki medals bad ha kajuh ka por yn jiew ruh ïa 5 ngut napdeng jong ki ban leit ïashim bynta sha ka International Competition kaba lah ban long ha ri Germany, Spain lane Ireland.
|
Phi don ban ong eiei?