Shillong: Mynhynnin ka sngi, u myntri ka tnad pule puthi ka jylla u Rakkam A Sangma u la iamir jingmut bad ki Principal jong ki skul bapher bapher ban iathir halor ki curriculum, ki kot pule, syllabus.
Ha kane ka jingiamir jingmut, la don ka jingai jingmut ban pynlong kompol sori biang ia ka sobjek Jingkhein namar ba kumba ka long mynta ka rukom ba la pyntrei kam ka Meghalaya Board of School Education ka long da ka jied san sobjek ban pass ne best of five, ha kaba kumba 90 percent ki khynnah kim treh ban shim ia ka sobjek jingkhein.
Ha kane ka jingiamir jingmut la wan iashim bynta kum ba 40 ngut ki Principal na ki Secondary bad Higher Secondary School.
“Ka la don ka jingai jingmut ban pynkylla ia ki kot pule namar ba ki don kiba shu jrong lynter tait, bad la don ruh ka jingkren ha kaba ki don katto katne ki skul ki bym pyndonkam ia ki syllabus ka Meghalaya Board of School Education (MBoSE)”, la ong u myntri.
Ha kajuh ka por, ka Directorate of Educational Research and Training (DERT) kan eksamin ia ki kot pule, ki jingduna, ki jingbiang, kan wad bniah bad kiwei ki jingdonkam bad kan sa aiti sha ka sorkar ba kan bishar shwa ban ai ia ka rai kaba khadduh halor kane.
Ka bha palat Lada pynlong compulsory biang ia ka jingkheiñ,namar ki khynnah ki lah leh sting palat ia kane.