Yn pynkiew tulop ka KHADC ia ki nongtrei Casual

Shillong,22 Iaiong:
Ka KHADC ka la shim ia ka rai ha ka Executive Committee jong ka ba kan pynkiew tulop noh ia baroh ki nongtrei Casual kiba ioh tulop hapoh ka T.5000 tyngka shi bnai bad yn pynkiew ia ki baroh khoit sha ka T.5000 tyngka shibnai katba kiwei pat kiba la ioh palat ia ka T.5000 tyngka kin iai neh kumto kumba ki ioh mynta.
U CEM ka KHADC u bah Pynshngaiñ N Syiem haba ia kren bad ki nongthohkhubor mynta ka sngi ha kamra treikam jong u u la ong ba ia katei ka sienjam la shim dei namar ba ki nongtrei Casual ka District Council ki ia kynduh jingeh ban trei ha I jingsiew iba rit khamtam ha kane ka pyrthei rem mynta. U la ong ba ki don kumba 20 haduh 25 ngut ki nongtrei kiba la trei slem hynrei ki ioh ia ka tulop kaba T.3000 tyngka shibnai, don pat kiba T.4000 tyngka shibnai, “Ngi la rai ban pynkiew noh ia ki baroh sha ka T.5000 tyngka shibnai,ki don ruh kiba la kham slem kiba ioh T.5000 tyngka shibnai ne tam ia kata –kitei kin bteng ban ioh ia katei ka juh ka tulop ba ki ju ioh” u la ong.
U bah Pynshngaiñ u la ong ruh ba katei ka tulop thymmai yn pyntreikam naduh mynta u bnai hi, hynrei ia ka jingsiew sha ki nongtrei yn siew hadien ba ka KHADC kan wanrah ia ka mang tyngka kaba pura ha ing dorbar ha ka dorbar ka ban long ha u bnai jylliew mynta u snem.
Nalor ka jingkiew tulop ki nongtrei Casual kin ioh ruh ia ka Arrear jong ki hadien ka mang tyngka kaba pura. U la ong ba yn siew sha ki ruh kumba siew tulop ia kiwei pat kinongtrei ka District Council da kaba pynrung ia ka tulop jong ka hapoh ka bank Account jong ki ha manla ka shi tarik ne ar tarik manla u bnai.