Yn pynkhuid Wah Umkhrah ka PHE

Shillong, 2 Risaw:
Katba ka tnad Public Health Engineeing (PHE) ka dang pynkhreh kumno ban pynkhuid ia ka wah Umkhrah hynrei na ka liang ka Khasi Hills Autonomous District Council (KHADC) pat ka la dep sdang da ka kam ban pyn khuid ia ka wah Umkhrah.
U Symbud Myntri Rangbah ba peit ia ka tnad PHE, u Dr RC Laloo u la ong ba ia mynta ka tnad PHE ka dang pynkhreh ban pynkhuid ia ki wah duid kiba tuid sha wah umkhrah.
Dr. Laloo u la ong ba la don ka jingpyrshang na ka por sha ka por da ki sengbhalang ban pynkhuid ia kane ka Wahum khrah.
“Hynrei nga sngew ba kam long kaba lah ban pynkhuid ia ka wah Um Khrah lymda don ka jingpyn khuid shwa ia ki wah duid kiba tuid sha kane ka wah”, la ong u myntri ka PHE.
Watla ym lah ban pynkhuid ia ka wah ban long kaba bit ban dih tang shisien, hynrei u myntri u la ong ba la dep ong ia ki ophisar ba ka thong kaba nyngkong ka long ban pynlong ia ka wah kaba khuid ban peit.
Halor ka jingthmu ka sorkar ban ai ia ka jingtyrwa sha ka Water Resources department ban pynkhuid ia kane ka wah, u Dr Laloo u la ong ba ka jingthmu ka tnad PHE kam don jingiadei ei ei bad ka projek ka Water Resources department.
‘Ha ka jingshisha, ym tang ia ka wah umkhrah, ki la pynkhreh ruh ia kiwei ki prokram kiba iasyriem ban pynkhuid ia ka wah Myntdu ha Jaintia Hills,” u la ong.
Lah ban kdew ba ka KHADC hapoh ka jingiakam u CEM Bah Pynshngain Syiem ka la dep sdang ban pynkhuid ia kane ka wah Umkhrah bad ka Council ka la dep mang ruh haduh T. 50 lak na ka bynta kane ka kam.