Yn pynjlan da 3 bnai ban ai tika, hadien ba la koit na ka jingpang covid

New Delhi:Ka National Expert Group on Vaccine Administration for COVID-19 (NEGVAC) ka la iasam ia ki jingai jingmut ba thymmai ha kaba iadei bad ka jingai tika bad ka Tnat ka koit ka khiah jong ka Sorkar Pdeng. Ia kine ki jingai jingmut la pynshong nongrim katkum ki jingkylla jong ka jinglong jingman ka khlam COVID-19 bad katkum ka jingpynthikna bad jingshem ba iadei bad ki stad science ha kylleng ka pyrthei.

Ka Tnat ka koit ka khiah jong ka Sorkar Pdeng ka la pdiang ia kine ki jingai jingmut, kiba long kumne harum, bad la pyntip ruh ia kine sha ki Jylla bad ki UT:

Ka jingpynjlan ia ka jingai tika COVID-19 ha ki jinglong jingman kumne harum –

i. Ki briew kiba la pynthikna ba ki ioh ia ka jingpang SAR-2 COVID-19 lyngba ka test; Yn pynjlan ia ka jingai tika COVID-19 da 3 bnai hadien ba la ioh jingkoit

ii. Ki nongpang SARS-2 COVID-19 kiba la ioh ia ka anti-SARS-2 monoclonal antibodies lane convalescent plasma: Yn pynjlan ia ka jingai tika da 3 bnai naduh ka tarik jong ka jingioh mih na hospital

iii. Ki briew kiba la ioh ia ka dose ba 1 bad ki ioh ia ka jingpang COVID-19 hashuwa ban pyndep ia ka dose kaba 2: Yn pynjlan ia ka dose kaba 2 da 3 bnai hadien ba la ioh jingkoit na ka jingpang COVID-19

iv. Ki briew kiba don ia kiwei kiwei ki jingpang ba kham jur ba donkam jingshah sumar ha hospital lane ha ICU kin hap ban ap 4-8 taiew hashuwa ba ioh ia ka tika COVID-19

Ki briew ki lah ban synniang snam hadien 14 sngi ba la ioh ia ka dawai COVID lane kiba test negative lyngba ka T-PCR, lada kidei kiba ioh ia ka jingpang COVID-19

La ai jingmut ban ai tika COVID-19 ia baroh ki longkmie ba dang ai buin khun.

Ym donkam ban leh screening ia ki nongioh dawai da ka Rapid Antigen Test (RAT) hashuwa ban ai tika COVID-19.

Ha kaba iadei bad ka jingai tika COVID-19 ia ki longkmie ba armet, ka dang don hapoh ka jingiamir jingmut da ka National Technical Advisory Group on Immunization (NTAGI).

Ka Tnat ka koit ka khiah jong ka Sorkar Pdeng ka la thoh shithi sha ki Jylla bad ki UT ban bthah ia ki ophisar ban peit ia kine ki jingai jingmut bad ban shim ia ki sienjam ba donkam ban pyntreikam ia ki. La ai jingmut ia ki Jylla ban pynthikna ka jingpynsaphriang jingtip sha ki kynhun ai jingshakri bad kumjuh ruh ki paidbah, lyngba ka jingpyndonkam ia baroh ki lad ai jingtip ha ki ktien tynrai. La bthah ruh ia ki Jylla ban sdang ka jingai jinghikai ia ki briew ba ai tika ha baroh ki kyrdan.