Yn pynieng ka BJP, san konstitwensi ha Bhoi

Shillong, 21 Jymmang:
Ka Bharatiya Janata Party (BJP) Ri-Bhoi ka la pynkhreh ban pynieng kyrtong na Ri-Bhoi ha baroh san tylli ki constituency. Kat kum ba la ioh lum ia ka jingtip, ka BJP kan pynieng baroh san ngut ki kyrtong na kitei ki constituency bad don kiba la iaid shakhmat ban lum ban lang ia ki paidbah na ka bynta katei ka ilekshon.
U President ka BJP Youth Wing na Ri-Bhoi district, u Bah C.G.R Syngkli u la iathuh ba kumba long mynta ka seng ka la iaid shakhmat ban thaw ia ki Polling Booth ha baroh san tylli ki constituency bad kiba bun ruh ki paidbah nongshong shnong ki la pyniasoh ialade lyngba ki polling booth namar ki sngewthuh ba ka Party BJP kaba don ia ka bor synshar ha ka ri hi baroh kawei hapoh ka jingialam u Narendra Modi kum u Prime Minister ka long ka Party ka ban kyntiew ia kiba bun ki kam pynroi khamtam eh ba ka district kaba long kawei na ki district ha ka jylla kaba sahdien, ki paidbah ruh ki angnud ban iohi ia ki jingkylla hadien u 2018.
U la ong ruh ba ka party ka angnud eh ba ki paidbah kin ai ia ka kti kamon kti kadiang jong ki ban jied ia ki kyrtong jong ka ha kane ka ilekshon, watla ka party kam pat dei ka por ban pyllait paidbah ia ki manifesto hynrei ka angnud ba haba ki paidbah ki jied ia ki kyrtong ba kan pynieng bad kin long ki nongthaw aiñ, dei ma ki ban long ki stieh jingiada ia ka jaidbynriew bad kaba ka la buh hakhmat eh ka long ban pynbeit ia u pud u sam ba baroh shi katta katei ka district ki paidbah kiba shong ha ki khappud ki mad jingeh, kaba kane ka dei kaba daw kaba hakhmat tam eh.
Nalor u pud u sam, ka party ka angnud ruh ba kan kyntiew ia ki kam pynroi naduh ki surok kali, ka umbam umdih, ka bording ilektrik, ki jaka pule naduh ki skul haduh ki kolej, ki jaka sumar nongpang kiba biang ne ki hospital, ki kam rep kam riang jong ki paidbah nongrep bad ka iohkam iohjam ki samla bad kiwei kiwei ki kam pynroi ha ka district.