Shillong, 9 Nailar:
Ka Thoh tim” kan sa paw shen ha ka pyrthei baroh kawei lada ka jingiateh kan urlong ha pdeng ka sorkar Megha laya bad ka kompenei na Scotland ka NEC Group Companies, kan urlong.
Kane ka NEC Group jong ki Companies ka la tyrwa ban wanrah da ki tiar kane ka juk mynta ha ka siat team kaba pyndonkam da ki tiar hyndai hynrei kaba pawnam ha kane ka jylla bad shabar ruh.
Mynshwa ka long beain hynrei ka sorkar ka la thaw ain. Kane ka thoh tim ka dei ka jingialehkai khalai ha kaba ki briew thied ia ki number naduh 1-100. Lada thied T. 1 bad lada shei ne pom, kin ioh T. 80.
Ia ka dei ka lait, la shim na ka jingiasiat kaba ju pynlong man ka janmiet ha Polo.
Mynta ka sorkar ka la don ka jingthmu ban pynlong ia ka ha ka rukom katkum kane ka juk mynta lyngba ka jingiakren bad ka kompnei na Scotland. U myntri ka tnad Information & Technology u Bah AL Hek u la ong ha kane ka sngi Thohdieng, “ngin thmu ban pynjanai ia ki rukom siat khnam hyndai ha kane ka thoh tim ha ka jylla kaban kynthup ne pynrung ia ka jylla ha ka map jong ka ri bad ka pyrthei da kaba iateh bad kane ka kompeni”.
U la ong ba ka sorkar ka thmu ban pynlong ha ka rukom kaba kham heh khnang ba ka sorkar kan kham ioh lum khajna khambun na kane ka jingiasiat tim.
Ka kynhun na kane ka kompeni NEC Group of Companies bad Micro Gaming na Scotland ki la wan jngoh ha Polo bad u Bah Hek halor kane ka jingsiat tim ha kane ka sngi Thohdieng ban pule bad peit bniah bad ban sngewthuh ia ka rukom siat tim ha kane ka jaka bad kumno ban pynlong ia ka katkum kane ka juk mynta.
U dkhot ka NEC GC u S Bhattacharyya u la ong ba ka jingiasiat khnam da ka rukom barim, ka dei ruh ka sap. U la ong ba kane ka kompeni ka kwah ban kyntiew ia kane ka jingialehkai ym tang ha Meghalaya hynrei sha kylleng ka pyrthei.
U la ba ka jingpyniakhleh lang da ka rukom barim bad kaba mynta kan pynkhlain ia kane ka siat tim bad yn die ruh da ka online kumba long bad leh ia kiwei ki kam khalai ne lottery ha kaba ki briew kylleng kin lah ban iashim bynta.
Phi don ban ong eiei?