Yn pynher shithi ka UDP, ban iakren ka Sorkar & Sengbhalang

Shillong, 8 Naiwieng:
Ka UDP jong ka East Khasi Hills ka la rai ban thoh sha ka sorkar ba kan pynkut noh ia ka jingiakhih jong ki sengbhalang ban dawa ia ka ILP ha kane jylla da kaba khot iakren.
“Ngin ban ia ka sorkar ba ka donkam ban thaw ia ki lad ki lynti kiba biang kum ka ILP ban khang lad ia ka jingwan rung pathar ki briew sha kane ka jylla kaba la buh ka jingma ia ki trai ri” la ong u Bah RA Lyngdoh uwei na ki dkhot ba kham rangbah ka UDP uba shah jied ruh kum u president ka UDP East Khasi Hills ha ka jingialang kaba long hynne ka sngi Thohdieng.
U la ong ba ka party kan kyntu ia ka sorkar ban iaid suki halor ka jingthmu ban pyntreikam ia ka Meghalaya Landlord and Tenants Bill.
“Ngi kwah ba ka sorkar ka dei ban ai ka bor kaba biang ia ki khlieh nongsynshar shwa ban pdiang ia kane ka Bill,” la ong u Bah RA Lyngdoh.
U Bah RA Lyngdoh u la ong ba kin ong ia ka sorkar ban pynbha noh wut wut ia ki surok kiba sniew palat ha ka jylla.
Nalor u Bah RA Lyngdoh, kiwei pat ki nongkitkam ka UDP East Khasi Hills ki long Bah Teinwell Dkhar kum u general secretary, Kong Banalari Khongwar kum ka treasurer, Kong Pretty Kharpyngrope kum ka president ka women wing bad u Bah Hamlet Dohling kum u president ka youth wing president.