Shillong, 13 Jylliew:
U Myntri ka tnad PWD u Bah Sniawbhalang Dhar u la ong ba ka jing pyndep ia ka surok VIP na Umroi sha Mawlai Maw roh yn pyndep ha u bnai Nohprah mynta u snem.
U myntri u la iathuh ia kane ha ka jingkylli ba la wanrah da u MLA ka Mawlai u bah Embhalang Syiemlieh hapoh ka iing dorbar mynta ka sngi ha iing dorbar. “Ka tnad ka la shim ia ki lad ki lynti ban pynsted ia ka jingtrei ia kane ka surok hapoh ka por ba la buh. La pynlong ia ka jingjurip man ka por bad ban shna bha ruh ia kane ka surok”, la ong u Bah Dhar.
U la ong ba ka ophis kan leh ia kaba donkam ban pynsted ia kane ka surok hapoh ka por ba la buh.
U la ong ba la thoh bunsien sha ki kontraktor ban pyndep kloi ia kane ka surok ha ka por kaba biang.
Shwa ia kane, u MLA ka Mawlai u Bah Embhahlang Syiemlieh u la buh jingkylli ia ka jingslem ban pyndep ia kane ka surok.
“U myntri kham mynshwa u la pynthikna ban pyndep ia kane ka surok hapoh u Jymmang mynta u snem. Hynrei mynta ka jingpyndep kan long haduh u Nohprah”, la ong u Bah Syiemlieh.
U la ong ba ka jingkhmih lynti jong ki paidbah ban ioh ia ka surok kaba bha ka long tang ka jingphoh sniew.
Ka jingtrei ha ka bynta ba hap ha ka 16 km haduh 19 km ka long kaba suki bha bad u Bah Syiemlieh u la ong ia u myntri ban ai ia ka kyrteng jongu kontraktor uba shna ha katei ka bynta.
U myntri u la iathuh ba ka jingtrei ha kitei ki bynta la ai ha kontraktor u Bah Charlet Dkhar.
Na ka T. 3.46 klur, u myntri u la iathuh ba kumba T. 2.07 klur la pynlait sha u kontraktor.
“Ka tnad kan ai jingthoh sha u kontraktor ban pynsted ia ka kam”, la ong u Bah Dhar.
Phi don ban ong eiei?