Yn pyndep ia ka GSWSS ha u Lber 2015, ong u Prof Laloo

Shillong, 16 Jylliew:
U Symbud Myntri Rangbah ka jylla u Prof RC Laloo u la iathuh ba ia ka Greater Shillong Water Supply Scheme (GSWSS) Phase III yn pyndep noh ha u Lber 2015.
“Ngi la hap ban buh por ban pyndep ia kane ka projek kaba la wanrah ia ka jingslem”, la ong u Prof Laloo hapoh ka iing dorbar thawain hynne ka sngi Nyngkong bad u la pynthi kna ba ka sorkar kan shim ia ki lad ki lynti ban pynsted ia kane ka kam kumba la buh por.
Halor ka jingkylli u MLA ka Mawlai ia ki daw ka jingslem, u Prof Laloo u la ong ba ki daw ka jingslem ka dei ka jingkhlad noh u kontraktor bad kiwei ki daw.
“Ka jingpynkhreh ban ai biang ia ki jingtrei ka dang iaid shaid shaid”, la ong u Symbud Myntri Rangbah ka jylla.
U la ong ba haduh mynta kumba 75 percent ki jingtrei ba heh la pyndep. “Ngin pyrshang ban pyndep ia kaba sah 25 percent kloi katba lah” u la ong.
Ha kajuh ka por u Prof Laloo u la ong ba ka tnad ka pyrshang ban pynbun ia ka jingsam um bad ruh ban shim ia ki lad ki lynti ban pynduna ia ka jinglehnoh ei ka um na ka Phase III.
Kane ka Phase-III la kdup shuh shuh kham bun ki shnong ban ai um kum ka Pynthorumkhrah.
Shwa ia kane, u MLA ka Nongthymmai u Bah Jemino Mawthoh u la ong ba ki paidbah ka constituency jongki ki iakynduh jingeh namar ka jingbym ioh um thikna.
“Ngi kyrmen ba kan pynbha ia ka jingioh um hadien ba la dep ia kane ka Phase III”, la ong u Bah Mawthoh. U MLA ka Nongthymmai u la buh jingkylli la ka jingthmu ka sorkar BJP ban pynduh noh ia ka skhim JNNURM kan don jingktah ne em ia ka GSWSS Phase III.