Yn pynbna ia ka result HSSLC, hapoh ka 31 tarik u Naitung

Shillong: Namar ka jingshah pynthut noh ha ka khlam Covid-19 kaba la wan ban lynshop tyngeh ha ka kynti kaba ar kaba la ktah ia ka eksamin kiew klas jong ki khynnah Seconday School Leaving Certificate(SSLC) bad Higher Secondary School Leaving Certificate(HSSLC) ba dei pyniaid da ka Meghalaya Board Of School Education(MBOSE) jong ka jylla Meghalaya ha kaba ki la don katto katne ki sobjek ki bym pat shym la lah satia ban pyndep, kumta na ka liang jong ka tnad pule puthi ka jylla ka la rai ban nym pynlong shuh ia ki sobjek kiba dang sah jong ka eksamin klas 12 lane ka HSSLC katba ia ka eksamin jong ki khynnah SSLC lane ka klas 10 bad klas 11 na ka bynta kito ki khynnah kiba khlem shym la ioh satia ban leit thoh na ka daw ba la shah pynthut ha ka khlam Covid-19, yn pynlong hapdeng jong u bnai Naitung.

Ia ka result na ka bynta ki khynnah klas 12 la buh ban pynbna ha lane shwa ka 31 tarik u bnai Naitung 2021.

Haba kren sha ki lad pathai khubor mynta ka sngi ka 23 tarik u bnai Jylliew 2021, u Myntri ba dei khmih ia ka tnad pule puthi ka jylla, u Bah Lahkmen Rymbui, u la ong ba ia ki sobjek ba dang sah jong ki khynnah klas 12 kata ka Computer Science, ka Statistics, ka Vocational Studies bad ka Western Music ha kaba ia ki marks na ka bynta ki khynnah kiba shim ia kitei ki sobjek la aiti ha ka MBOSE kat kum ba shah ka kyndon.

U Bah Rymbui u la iathuh ba ki don haduh kumba 74 ngut ki khynnah ki ban iakhun ia ka eksamin SSLC lane ka klas 10 kiba khlem ioh satia ban iakhun ia ki katto katne ki sobjek bad ki don 34 ngut ki khynnah kiba khlem ioh ban iakhun ia baroh ki sobjek. Katba ki don haduh kumba 92 ngut ki khynnah kiba la duh ban ialeh ia ki katto katne ki sobjek jong ka klas 12 bad 15 ngut pat ki khynnah ki khlem ioh thoh ia baroh ki sobjek jong ka klas 12 na ka daw ka jingpynwit jong ka khlam Covid-19 bad na ka bynta kine ki khynnah kiba la duh ban thoh ia ka eksamin, ka tnad pule puthi ka la rai ban pynlong ia ka eksamin ha u bnai Naitung bad ka tnad kan sa leh ia kaba donkam ha shwa ba kan pyntip ia kane sha ka MBOSE.