Shillong: Ka KHADC kan sdang noh ban pynkhlaiñ ia ka tnad khaïi pateng jong ka da kaba sdang ban kyntiew dor ia ka bai pynthymmai laisen khaïi.
Haba ia kren bad ki nongthohkhubor myn hynnin ka sngi u Executive Member uba bat ia ka tnad khaïi pateng u bah Paul Lyngdoh u la ong ba nangne yn pyntreikam ia ka Trading By Non Tribal Act 1954 katkum ki mynsiem jong ka. U la ong ba mynta ka sngi ka tnad ka la lum jingialang ia ki ophisar ban pyrkhat kumno ban pynthymmai ia ki rukom treikam, khnang ban pyrkhing ia ka jingioh laisen jong ki bar jylla bad ban pynshlur ia ki samla trai muluk ba kin sdang ia ka kam lajong. U bah Paul u la ong ba ka jaitbynriew jong ngi ka dang sdang ia ki kam khaïi pateng dang shi pateng mynta bad khyndiat kiba ar pateng, hynrei kiwei pat ki jaitbynriew ki la sdang da ki spah snem.
U bah Paul u la ong ba ka aiñ khaïi ka kren shai ba yn ym lah ban ai laisen sha kiwei pat, lada jia ba kata ka jingpan laisen jong ki ka dei ka kam kaba ki trai muluk ki la lah ban trei bad yn ym lah ruh ban dang pynthymmai biang ia ka laisen jong ki lada ka dei ka kam ba la lah ban trei da ki trai muluk.
Ha kaba ia dei bad ka jingkyntiew dor bai laisen pynthymmai ia ki bar jylla u bah Paul u la ong ba la aiti ha ki Secretary bad ki ophisar ba kin pynbeit ia ka dor bad kin phah sha u hapoh shibnai khnang ba un rah sha ka EC ban ioh ka jingmynjur. Katkum ka jingbatai jong u, u la ong ba kumba ka long mynta ka bai pynthymmai laisen ki First Class Contractor ka long tang T.5000 tyngka bad ki kompeni ba heh kum ka Lafarge tang T.15000 tyngka. “T.15 hajar tyngka shisnem ban siew sha ka District Council, kat ka Lafarge ka dei ka bym lah long, teng teng wat ba ngi leit bamja shi paralok ruh ym pat dap T.15 hajar” ong u bah Paul. U la ong ba kat bym pat dep ban buh dor thymmai, yn ym pat treh satia ban pynthymmai ia la laisen jongno jongno ruh.
IA KI NONGDIE MADAN
Ha ka kaba ia dei bad ki nongdie madan u la ong ba ka aiñ ka kren shai ba ki nongdie madan ruh ki dei ban don laisen khaïi lym kumta yn kyndang ia ki, “Ki nongdie madan hangne ki la lehmon palat, mynta ngin shim ia ka sienjam ban kyndang beit ia ki bym don laisen” ong u bah Paul Lyngdoh.
KI DORBAR SHNONG
Ha kaba ia dei bad ka jingai No Objection Certificate (NOC) ba ki Rangbah Shnong ki ju ai sha ki bar jylla na ka bynta ban aplai Trading License, u bah Paul Lyngdoh u la ong ba yn ym pdiang satia ia ka NOC kaba ai da u Rangbah Shnong nangne shakhmat hynrei yn ithuh beit ia ka NOC kaba la mynjur da ka Dorbar Shnong bad katei kan ym dei satia tang na ka bynta ka laisen thymmai hynrei na ka bynta ban pynthymmai ia kaba rim ruh bad kito ki bar jylla kiba wan pynthymmai khlem da ioh NOC na ka dorbar Shnong yn mait beit ia ka laisen jong ki.
KA IOH KAM IOH JAM KI TRAI MULUK
U bah Paul u la ong ba ka ju don ruh ka jingteh kyndon bad ki kompeni heh lane ki kontraktor heh ban ai kam ai jam ia ki trai muluk haba ai laisen ia ki hynrei bun na ki trai muluk kip het noh na ka kam namarba ka rit palat ka jingsiew , halor kane u la ong bay n hokum ba ka dor siew ka dei ban long beit katkum ka minimum Wages jong ka sorkar jylla.
KA JINGDUNA PULIT KA DISTRICT COUNCIL
Namar ka jingduna pulit ka District Council na ka bynta ban khynra laisen bylla lane laisen khaïi bad kiwei pat ki jingdonkam, u bah Paul Lyngdoh u la ong ka Distric Council kan pynbor ia ka sorkar ba ka dei ban mynjur noh ia ka District Police Bill kaba sahteng naduh mynshuwa ba kan long aiñ noh bad hadien ba ka la long aiñ yn pynbiang lut nadong shading ia ki pulit District Council kum ki suloi bad kiwei ki jingdonkam.
Phi don ban ong eiei?