Shillong: U myntri kam pohing ka sorkar India u Amit Shah mynta ka sngi u la ong ia ki nong ialam ka sorkar Meghalaya ba ka sorkar India ka dang pule bniah shwa ia ka jing dawa Inner Line Permit ka jylla Meghalaya.
Lah ban kdew ba ka ing dorbar ka Meghalaya ha ka 30 tarik nohprah 2029 ka la pynmih ia ka ‘resolution’ ban pyntreikam ILP hapoh Meghalaya.
Kumba shu ban ki nong mih khmat ka sorkar Meghalaya ki ba kynthup ia u myntri rangbah ka jylla u Conrad K Sangma, u symbud myntri rangbah ka jylla u Prestone Tynsong lem bad kiwei ki myntri ka sorkar kynthup ia u Banteidor Lyngdoh, Hamletson Dohling, Lambor Malgniang bad ki MLA kiba kynthhup ia u Nujorki Sungoh u Marcuise Mark u Renikton Lyngdoh Tongkhar bad u Adelbert Nongrum mynta ka sngi ki la ia kynduh ia u myntri kam pohing ka ri India u Amit Shah halor ka jing dawa pyntreikam ILP hapoh ka jylla Meghalaya.
U myntri rangbah ka jylla u Conrad K Sangma u la ong ba ka jing ia kynduh ia u Amit Shah ka long ka ba seisoh namar ba u la kular ruh ba un sa nang pule bniah bha haba dei bad ka jing pyntreikam ia ka ILP hapoh ka jylla. Nalor ka jing dawa ILP u Conrad K Sangma u la ong ba ki nong mih khmat ka jylla ki la ia kren ruh halor u pud u sam lem bad ka roi ka par na ka bynta ka jylla Meghalaya.
U myntri rangbah ka jylla u la ong ba u Amit Shah u la kular ba ka sorkar India kan ia leh beit bad pynim bad ban iada ia ka hok ki paidbah ka rilum Meghalaya.
Phi don ban ong eiei?