Shillong: Ka jylla Gujarat kan ai jaka sngewbha ia baroh ki jylla ka ri kynthup ka jylla Meghalaya ban shna iing ha ka jaka ba la tei ia u mot dur u Sardar Vallabhhai Patel, la ong u myntri ka tnad ka koit ka khiah ka jylla Gujarat u Kishore Kanani ha kane ka sngi Ba ar ha Shillong.
U Kishor Kanani, myntri ka koit ka khiah ka sorkar Gujarat, ha ryngkat bad kiwei ki heh sorkar na Gujarat, kiba ia kynduh ia U Conrad Sangma, ha ka 15tarik Risaw 2018.
Ia une u mot jong u Sardar Vallabhhai Patel, kaba la ai kyrteng kum u mot jong ka jingiatylli (Statue of Unity) la tei ha ka jingjrong kaba 182 meter ha ka jinglut kaba T.2036 klur.
U Kanani u la ong “Ka la don ka jingtyrwa kaba dang iaid mynta ban shna ia ki iing jong baroh ki jylla khnang ba kane ka jingthmu kan long kaba jop ban long kum ka kynja ban pyniasoh bad ka met jong ka jingiatylli kumba la tei ia une u mot dur jong u Sardar Vallabhhai Patel.
U la iathuh ba u myntri rangbah ka jylla ka Gujarat U Vijay Rupani, u la thoh shithi sha u Myntri Rangbah ka jylla u Conrad K Sangma halor kane.
Kane ka kynhun ki myntri sorkar ba ialam u Kanani na Gujarat ki la iakynduh ruh ia u Lat ka jylla u Tathagata Roy ban khot sngew ia u bad kumjuh ia u myntri rangbah ka jylla sha ka jingplie ia une u mot dur da u Myntri Rangbahduh ka ri u Narendra Modi.
U Kanani u la iathuh ba ia une u mot dur yn don ka jaka peitkai kaba jrong 500 phut ha kaba lah ban iohi ia ka Sardar Sarovar Dam.
U la ong bahadien ba la plie, yn don kumba 15,000 ki nongjngohkai man ka sngi ha kane ka jaka bad kane kan pynkiew ia ka ioh ka kot jong ki paidbah bad ka jylla.