Shillong: Ka ophis treikam ka Deputy Commissioner (DC) ka East Khasi Hills District kum shi bynta ban ailad ia ki paidbah, ba kin leit thied jing thied la pynbna ban shah plie ia ki dukan die marbam bad kiwei de kiba la ithuh da ki bor sorkar naduh 20 tarik haduh 23 tarik jymmang 2020, hapoh ka nongbah Shillong bad ki jaka markhap.
Ka hukum na ophis DC ka pynshai ba ia ki dukan hapoh ka nongbah Shillong bad ki jaka markhap kiba la ithuh na ka ophis sorkar, la pynbun haduh 2122 tylli katba iaki kali ba die marbam la pynbun haduh 20 tylli kum shi bynta ban ailad ia ki paidbah ban ioh lad ban thied marbam bad khanglad iaka jing ialum paidbah hapoh ki dukan.
Haba dei bad ki dukan die bad shna mobile, ki dukan die computer, ki dukan ban ‘recharge mobile’, ki dukan stationary bad ki dukan shna kali kiba tang tang marwei, ka ophis treikam DC, la pynbna ban yn shah ban plie tang ar sngi hapoh ka nongbah Shillong kata naduh 21/05/2020 bad ka 22/05/2020 ha ka por 9.00 baje mynstep haduh ka por 4.00 baje janmiet.
Ia ki dukan kyiad kiba la ithuh da ki bor sorkar la shah ban plie hynriew sngi, kata naduh 18 tarik haduh 23 tarik jymmang 2020 naduh ka por 9 baje mynstep haduh 4 baje janmiet hapoh jong ka East Khasi Hills District bad ki jaka ba hap hapoh ka Civil Sub Division Sohra, bad Pynursla bad ki dukan kiba shah ban plie man ka sngi ki long, ki dukan dawai (pharmacy) kiba die khutia bad kiba die lang, ki dukan die dawai ia ki jingri bad ki jaka sumar ia ki jingri, ki petrol Pump, ki dukan ba shu leit ban ai ia ki jingbam, ki karkhana shna kali ia ki Trok ha ki surok bah ki jingtrei ba trei kam la jong, kiba shna light, shna pipe um, shna komputer bad ki jaka misteri dieng.
Iaki dukan kiba don ha ki shnong ba hap hapoh ka Pynursla, Sohra Civil Sub Division bad kiba hap hapoh jong ki C&RD Block, na ka liang ka ophis treikam DC la shah ban plie san sngi ha ka shi taiew.
Na ka liang ka ophis treikam DC ka la bthah ba baroh ki dei ban bud ryntih ia ki jingbthah jong ka sorkar ba dei ban pyniajngai iwei na iwei, ha ki jaka trei bad ki dorbar shnong kin peit ba kan don ka jingbud ryntih ia ki kyndon kiba la buh.
Phi don ban ong eiei?