Yn plie ia ka Parish Iongshiwiat, ha ka 18tarik mynta u bnai

( M.M.Thaiang,Chief Editor u Yutip)
Jowai: Ka Diocese Jowai kan plie sa kawei ka Parish ha Iongshiwiat ha kane ka 18 tarik mynta u bnai bad ka Parish kaba 18 jong ka Diocese Jowai, ong u Most. Rev Victor Lyngdoh, Bishop ka Diocese Jowai.

Ia kane ka Parish Iongshiwiat la aiti hapoh ka jingpyniaid jong ki Phadar na ka jingiasyllok Society of Divine Word, ha kaba u Phadar Antony Manoj, u Parish uba nyngkong jong kane ka Parish. Ia ka jinglehniam plie ia kane ka Parish bad pynkhamti hapoh ka jingpeit jingkhmih jong ki Phadar Society of Divine Word, yn pyndep ha ka por ka jingknia Mass bakhuid ka ban sdang ha ka por 10 baje mynstep (10.00 AM) ka ban lamkhmat da u Most Rev. Victor Lyngdoh ha ryngkat ka jingsynran ki Lyngdohsohblei (Phadar) ki ban wan na ki Parish bapher bapher jong ka Diocese Jowai bad nabar.
Na ka liang ka Organizing Committee kaba dei pyniaid ia ka kane ka prokram Plie Parish bathymmai ha Iongshiwiat, ka la khot la wer ia ki parakhristan na ki Parish bapher bapher jong ka Diocese Jowai bad ia kiba na ka Archdiocese Shillong ba kin iawan shongshit ban ia sakhilang ia kane ka jingplie ia kane ka Parish Iongshiwiat. Ha ka 1.30 nohphai sngi yn sdang ka jingiaseng nohsngi, ka jingmane Sakrament bad bud sa ka jingleh burom ia ki Lyngdoh ki ban shimti ia kane ka Parish kaba thymmai.
Ka shnong Iongshiwiat ka jngai kumba 30 Kilomiter na Jowai. U surok rong uba bha uba ym don jingwit ia ki Kali rit bad ia ki Kali heh ban iaid ban poi sha Iongshiwiat. Ia ki Kali kiba wan na Arch Diocese Shillong ban poi sha Iongshiwiat, ki hap iaid lyngba ka shnong Ummulong-Wahiajer Nartiang kaba jngai kumba 26 Kilomiter na Ummulong bad ia ki Kali kiba wan na ka Parish Mowkyndeng, Sahsniang, Phramer,Sutnga, Jalaphet, Khliehriat, Lumshnong, Umkiang, Ladlakadong bad Ladrymbai kin iaid na 4 Mer surok Nangbah- Nartiang kaba jngai kumba 30 Kilomiter na 4 Mer sha Iongshiwiat katba ia ki Kali kiba wan na ka Parish Amlarem bad Parish Jowai ki lah ban na u surok Ummulong lane na u surok 4 Mer Nangbah-Nartiang.
Ha ka juh ka por u Most. Rev. Victor Lyngdoh dd, Bishop ka Diocese Jowai ha ka jingpynlait khubor mynta ka sngi ha Jowai, u la kyntu jur ia ki Paid Khristan na ki Parish bapher bapher jong ka Diocese ba kin iawan shongshit bad ban pynkhraw ia kane ka sngi ha kaba ka Diocese ka la lah ban plie sa kawei ka Parish bad ka long ka Parish ka 18 jong ka Diocese Jowai.