Yn pan jingmut ka HPC na U Jathedar ka Akal Takht ban mih noh na Them Metor

Shillong: Ka Harijan Panchayat Committee (HPC) ha ka sngi Nyngkong ka la kyrpad sha ka sorkar jylla ban pynjlan ia ka por ban jubab halor ka jingthmu ban pynkynriah ia ki 342 tylli ki longing na Them Iew Mawlong (Sweeper’s Lane).

Kane ka long hadien ba ka por kaba 15 sngi ba la ai da ka sorkar jylla sha ka HPC ban pynsngew ia ka rai ba khatduh jong ka halor kane ka jingtyrwa ka la kut noh ha ka sngi Nyngkong.
Ha ka jingpynlait khubor, u secretary ka HPC u Gurjit Singh u la ong ba hadien ka jingialang kaba dang shen ha kaba u Deputy Chief Minister u la ai jingmut ba ka Committee kan pynsngew ia ka rai ba khatduh jong ka hapoh ar taiew, ka Harijan Panchayat Committee ka la ban jur ba ka por kaba lyngkot kam biang satia ia ki ban iasyllok bad ki ba ha khlieh duh. ki bor synshar jong ka jaitbynriew Sikh.

“Ngi thmu ban pan jingmut na u Jathedar jong ka Sri Akal Takht Sahib, na ka Shiromani Gurdwara Prabandhak Committee ha Amritsar, na ka Delhi Sikh Gurdwara Management Committee, bad na kiwei kiwei ki sengbhalang bad ki nongïalam ba rangbah ha ka imlang sahlang. Ka jingpyniaid jong ki ka long kaba kongsan bha”, la ong u Singh.
“Da kaba pyrkhat ïa ki jingïateh kular ba mynta bad ki jingkular ba la dep jong ki nongïalam niam Sikh, ki la pynpaw ba kin ym lah ban ïamir jingmut ha kine ki ar ne lai taiew ban wan.”

Ka shithi ka la ai jingmut ba ha ka jingshai jong kine ki jinglong jingman, ka Harijan Panchayat Committee ka kyrpad ba ka jingïalang kaba bud halor kane ka kam dei ban buh por kumba ha ka taiew ba khatduh jong u bnai Nailur. Ka Committee ka kyrmen ba ha kata ka por, kin sa lah ban wanrah ia ka jubab kaba la pyrkhat bha kaba pynpaw ia ka jingiamynjur lang jong ka imlang sahlang kaba kham heh.