Yn nym pyntreikam Ain shipai, ka sorkar pdeng ha Garo Hills

Shillong, 15 Naiwieng:
Ka NPP ka la ioh pynhiar mynsiem khyn diat haba ka sorkar pdeng ka la rai ban nym pynjari ia ka ain shipai ha Garo Hills.
Ha ka jingpynlait kyrwoh ha kane ka sngi u Blei, ka NPP Meghalaya State Unit  ka la pynpaw ia ka jingsngew kmen hadien ba ka sorkar pdeng ka la rai ban iakhun pyrshah ia ka rai jong ka Meghalaya High Court ban pynjari ain shipai AFSPA ha rilum Garo Hills.
“Ki paidbah ka rilum Garo ki sngew kmen ban tip ba ka sorkar pdeng ka la rai ban iakhun pyrshah ia ka hukum ka  Meghalaya High Court  ia ka jingpynjari ain shipai bad kyrmen ba kan wanrah ia ka jingmih kaba katkum ka jingkwah jong ki paidbah halor kane ka jingshim ka sorkar pdeng”, la ong ka NPP. Ka NPP ka la ther ia kane ka sorkar ba ialam da u Myntri Rangbah u Mukul Sangma da kaba ong, “ ka jylla Meghalaya ka iakynduh ia kane ka apot bym don shuh ka ain ka nun bad ka shong suk shong sain ka dei namar ka jingbym ler ka sorkar.  Ngi pynrem jur ia ka jinglong hangamei jong u Dr. Mukul Sangma uba pyni sha ka pyrthei ba um pat long uba bit ban bat ia kane ka kam kum u Myntri Rangbah ka jylla”,.
Ka party ka la ong ba ka jingbym ler jong u Myntri Rangbah ka  la pynlong ia ka  Meghalaya High Court  ban pynmih ia ka hukum haduh ban pynjari da ka ain shipai ha Garo Hills. Shwa ia kane u Working President ka NPP u Conrad Sangma  u la iakynduh ia u Myntri kam pohiing ka ri u Kiren Rijiju ban tuklar lem ka sorkar pdeng halor ka hukum ka Meghalaya High Court ban pynjari da ka ain shipai AFSPA  ha Garo Hills. Ka GHPA kaba dei ka liangsynshar ha GHADC, kynthup ka NPP, GNC bad ka BJP bad ki sengbhalang ha Garo Hills ki la pynpaw ia ka kmen ia ka jingshah shkor jong u Rijiju  ban nym pynjari da ka ain AFSPA ha Garo Hills.