Yn nym pyn thylli ka ia ka iarong ki ADC, ong u Mukul

Shillong, 5 Lber:
Ka sorkar jylla kan leit ban iakren bad ka sorkar pdeng na ka bynta ba kan bhah pisa na ka bynta ki Autonomous district councils (ADCs) hadien ba ka 14th Finance Commission kam shym la bhah pisa ia ki.
U Myntri Rangbah u Dr Mukul Sangma u la pynsngew ha ki nongialam ka KHADC ba la mihkhmat da u Chief executive member (CEM) Bah Adelbert Nongrum ha ka jingialang ha kane ka sngi Thohdieng.
“U Myntri Rangbah u la pynthikna ba ka sorkar kan iakren wut wut bad ka sorkar pdeng ba kan bhah pisa ia ki ADC”, la ong u Bah Nongrum.
Ha ka jingialang, u CEM  ka KHADC u la iathuh ba ka sorkar  ka 14th Finance Commission ka la leh klet khlem dab hah pisa bad kane ka la buh jingeh ia ki ADC.
“Kane ka jingleh ka 14th Finance Commission ka la long kumba iaid lait ia ki kyndon ba la buh da ka riti synshar ka ri” la ong u CEM.
Lah ban kdew ba ka liangpyrshah ha KHADC ka People’s Democratic Forum (PDF) ka la dawa ba ka EC ba la ialam da ka All Regional Parties Alliance (ARPA) ba kan ialam ban leit sha Delhi ban iakren ia kane ka mat.
U CEM u la ong ba ka EC kan sa shong jingialang shen bad kan iakren ia kane.
Ka PDF ka la kynnoh ba ka ARPA ba kam shym la buddien ia ka T.200 klur kaba la phah da ka ECba ialam da ka Congress ka KHUDA na ka 14th Finance Commission.
Ha kawei ka liang, ka chairperson ka Teilinia Thangkhiew ka la ong u Myntri Rangbah u la ong ba ym dei ban tieng ia kane.
“U  CM u la ong ba ka sorkar pdeng kan nym pynduh pisa ia ki ADC, hynrei kan ai beit kumba ka dei ban ai”, la ong ka Kong Thangkhiew.
Ha kawei pat ka khubor, na ka liang jong U CEM ka Khasi Hills Autonomous District Council (KHADC) u Bah Adelbert Nongrum, u la dawa na u Myntri Rangbah ka jylla  u Dr Mukul Sangma ba un pynsted ban pynlait noh ia ka bhah jong ka Council kaba dei ban ioh na ka jingioh lum khajna na mar poh khyndew.
“Ngi la kyntu ia u Myntri Rangbah ban leh ia kane ka kam kloi ban pynlait noh ia ka bhah jong ka Council”, la ong u CEM Bah Nongrum ha ka jingthoh sha u Myntri Rangbah ha kane ka sngi Palei.
U la ong ba ka jingpynlait ia ka bhah khlem biang por ka la buh jingeh ia ka Council ban pyndep ia ki jingdonkam.
Katkum ka jingong u CEM, ka Council ka la ioh pdiang ia ki bhah na ka sorkar jylla na ki maw pohkhyndew bad ki khajna na ki kali kaba long 60:40 na ki mar pohkhyndew bad 25:75 na u dewiong.