Yn nym leit jingialang ka SKRS

Shillong, 8 Rymphang:
Ka jingialang jong ka Synjuk ki Rangbah Shnong (sor bad khapsor) kaba la long ha ka 31 tarik Kyllalyngkot, ka la aiti ha ka joint action committee jong ka synjuk ki rangbah shnong ha kaba iadei bad ka jingialang ba la khot da u DC halor ka phang National Population Register kaban long ha ka 11 tarik Rymphang .
Ka JAC kaba la iashong jingialang ha ka 2 bad 4 tarik Rymphang, ka la pyrkhat sania bha halor katei ka kam bad da kawei ka jingmut ka la rai ban nym leit iashim bynta ha katei ka jingialang katba ym ioh ia ka jingpynshai na ka liang ka sorkar halor ka jingiadei ka sorkar bad ki dorbar shnong bad ki rangbah shnong bad ia ki rukom treikam jong ki rangbah shnong bad ki dorbar shnong kumba ka long mynta. Shuh shuh la rai ruh ban thoh da ka shithi bad ban pyntip sha u DC halor kane ka rai. Kane ka long katkum ka kyrwoh u Bah RL Blah u general secretary ka SKRS.