Yn ngor hi ka shnong ia ki dieng, maham ka Mawiongrim

Shillong, 27 Nailar:
Ka dorbar shnong Mawiongrim ka la maham ba ka shnong kan ngor noh bad kan pom ia baroh ki dieng kiba pynwit bad kiba don jingma ia ki iing ki sem hapoh ka shnong lada ki trai jaka kim treh ban kohnguh ia ka shnong.
Ka dorbar shnong ka la shim ia kane ka rai hadien ba bun ki dieng kiba ieng hajan iing ki la buh jingma khamtam haba wan ka lyer lada kin khyllem ki ban ia ki iing kan sa wanrah ka jingduh kaba khraw. “Ngi la ioh jingujor na ki nongshong shnong kiba ka iing jongki ki la shah ban ha ki dieng bad kito kiba lah ban don ka jingma”, la ong u secretary ka shnong Bah Iangrai ha kane ka sngi Saitjain.
U la iathuh ba ha kine ki sngi la don ki dieng kiba la ban ha ki iing briew bad ki kali namar ki khyllem na ka jingbeh ka lyer. U la ong ba bun kito ki briew kiba don jaka ha kane ka shnong, kim ju wan mih ban ngor noh ia ki dieng kiba la ka shnong ka ju pyntip sha ki. “ngim banse lada kim sngap ngin ngor ngin pom hi noh ia ki dieng”, la ong.
Ha kine ki sngi, la don ka iing kaba la shah ngat ha ki dieng kseh, bad ka kali ba shah ban ha ka dieng kaba khyllem namar ka jingwan ka lyer. “Ym tang ki dieng ki siej hynrei ngi la bthah ruh ba ki trai kin pom noh ia ki siej kiba don ha jingma namar ba ki don ha jan ka power line”, la ong u secretary ka shnong Bah Iangrai.U la iathuh ba ka shnong kan leit ban thoh sha ka tnad Forest ban pan jingbit ban ngor bad ban pom noh ia baroh ki dieng kiba don jingma ia ka shnong lada ki trai kim wan ban leh hi.