Yn nai pynthame paidbah, ka BJP ka don ia baroh ki ain ha kti jong ka, ong U Dr Mukul Sangma

Shillong: Halor ka jingdawa jong ka seng BJP ban kem ia u Myntri ka tnad bording u James Sangma, na ka liang u nongialam ka liang pyrshah, u Dr Mukul Sangma u la ong ba ka BJP kam dei tang ban heh tang ka nia, hynrei ka dei ban thoh sha ka ophis jong u myntri rangbah duh jong ka Ri; kat kum ki kyndon jong ka ain bad u la ong ruh ba kaei kaba khanglad ia ka BJP ban leh ia kane. Kane ka jingleh jong ka BJP ka long tang ban shu pynthame ia ka paidbah.”Ka BJP ka don ia baroh ki ain ha kti jong ka, ki dei ban leh da ka kam ym ban shu kren” ong U Sangma.

Haba ia kren bad ki lad pathai khubor, u Dr Mukul u la ong ba na ka liang jong u, u la dep ban phah da ka jing thoh sha u Lat jong ka jylla ha kaba ia dei bad ki jingkynnoh bamsap ha kaba iadei bad ki Autonomous District Council.

U la ong ba ba ka jingpynduh ia ki sabut, ka dei ka kam sniew, bad u sngewlehrain ban iohi ba ki mih ha ki lad pathai khubor, halor ki kam khaii beain ia u dewiong, kaba la pynpaw ia ka kyrteng jong u myntri sorkar.

Na ka liang jong ka seng Congress ka ap khmih lynti ba ka ain kan sa leh ia kaba donkam bad halor kane ka donkam ia ka jingtohkit kaba lait luid.

U la ong ruh ba ki nongtrei jong ka GHADC, ki la iap thngan bad ki la mareh na kawei ka lad sha kawei pat ban ioh ia ka tulop jong ki, hynrei kum ba kala long ka bhah kaba dei ban ioh ia ki khajna la shu jah klep bad u la kynnoh, ba ym tang ia u dewiong hynrei da ki spah tylli ki trok kiba kit maw, hynrei kam don jingthew bad kane ka wanrah ia ka jingduhnong.

Haba ia dei bad ka jingpynkynriah kam ia ki DC bad ki SP, kaba khah khah bad ia ki khlieh jong ki tnad sorkar, khamtam hapoh ka tnad ba dei peit ia ki marpoh khyndew bad ka jingbuh ia u CMD jong ka MeECL, ka pyni ba u briew ba bat ia kane ka kam u la dei u briew ba phylla shisha.

Haba ia dei bad ka MeECL, u Dr Mukul u la kynnoh ba ka la jyllei bha ki kam bamsap bad ula kylli ruh “Hato la juh iohi ba u ophisar ba dang rit ka kyrdon un long u CMD jong ka MeECL?” bad kane ka pyni, ba ka jingleh, ka long ba kin lah ban hukum, katba ki sngew bit.