Nongpoh: Ka District Level Subroto Mukherjee Cup 2019, kaba la pynlong da ka ophis u District Sports Officer Nongpoh, ka la poi noh sha kaba kut hynnin ka sngi ha madan ialehkai ka shnong Umsaitsning bad lyngba jong kane ka sngi, ki la don Lai tylli ki skul na Ri Bhoi, kiba la pynthikna ialade ba kin ioh ioh mihkhmat na Ri Bhoi, na ka bynta ban aireng sha ka State Level Subroto Mukherjee Cup ka ban sa long haNongbah Shillong.
Ha kaba pynkut ia katei ka lympung, la sakhi da ka jingdon u Bah Arki Nongrum, CEO ka Meghalaya Football Association kum u Kongsan bad u Bah Dipshon Ryntathiang, General Secretary ka RBDSA kum u symbud kongsan, ha ryngkat ka jingdonlang u Bah P.M Marbaniang, DSO ka Ri Bhoi, u Bah R. Kharkrang lem bad kiwei de.
Haba phai sha ka jingiakhun phainal kaba la long hynne ka sngi, ha kaba ka jingiakhun kaba nyngkong ha ka U-14 Boys kaba la long hapdeng Evershine UPS pyrshah ia ka Khlieh Umstem SS, ha kaba ka Khlieh Umstem SS ka la lah ban pynliem noh ia ka Evershine UPS haduh 4-0.
Ha ka U-17 ki kynthei, ka Sati Raja Memorial SS, ka la ioh ban rah ia ka namlahduh hadien ba ka la lah ban pynliem noh ia ka St. Micheal HSS da 5-0.
Hynrei ka jingiakhun kaba la kham pynitynnad bad pynshongshit eh ia ki nongpeitkai, ka dei ka jingiakhun hapdeng ka Mynken Christian HSS, Bhoirymbong pyrshah ia ka Pratlynti SS kaba dei na Sohliya Umsning, ha kaba ka jingiakhun jong kine ki ar kynhun ka la long kaba iakhaid bad iabiang bor bad ha ka jingiakhaid naduh ka kylla step haduh ka kylla miet, kumta la rah noh ia ka jingiakhun sha ka Tie Breaker bad dei hangne ba ka Pratlynti SS ka la lah ban pynliem noh ia ka Mynken Christian HSS da 4-3.
Hadien ba la kut ka jingiakhun, na ka liang ka ophis u DSO, ka la sam ruh ia ki khusnam shimet sha kito ki khynnah kiba la lah ban ialehkai bha ha kane ka lympung bad iaka nam Best Goalkeeper ha ka U-17 Girls la ioh da ka Bilika Lamare na ka skul Raid Iapngar UPS, ha ka U-14 Boys pat ia ioh da u Baniohnam Shadap na ka Nehru Memorial HSS bad ha ka U17-Boys la ioh da u Jophila Mynsong na ka St.Francis SS.
Katba ia ka nam Best Player ha kane ka lympung ha ka U-17 Girls, la ioh da ka Banrinylla Nongdhar na ka St. Micheal HSS, ha ka U-14 Boys da u Lamphrang Lyngdoh na ka Christian HSS Nongpoh bad u Ribankyrshan Rympei na ka Mynken HSS Bhoirymbong. Katba ha ka nam Best Player ha ki kynthei la ioh da ka Ibahunshisha Malieh na ka Sati Raja Memorial SS, u Bansngewrit Shlem na ka Khlieh Umstem SS ha ka U-14 bad u Iaryngkat Kharkrang na ka Pratlynti SS u la ioh ha ka U-17.
Lyngba jong katei ka namjop ka Pratlynti SS ha ka U-17, ka Khlieh Umstem SS U-14 bad ka Sati Raja Memorial SS ha ka U-17 ki kynthei, ki hap ban pynkhreh bha ialade na ka bynta ban ioh aireng sha ka State Level ka ban sa long ha Nongbah Shillong.
Phi don ban ong eiei?