Shillong, 1 Jymmang:
Ka Sabina Parvez Warjri kaba dei ka Miss Shillong 1995, bad kaba la mihkhmat ia ka jylla Meghalaya ha ka jingïakob Mrs South Asia India kaba la long ha ka 25 ïaïong ha nongbah Delhi, mynta kan ïoh ïa ka lad ban mihkhmat na ka bynta ka ri India ha ka jingïakob ba kham heh ka Mrs. India Universal 2017 ka ban sa long ha London naduh ka 3 haduh ka 10 tarik nailur (september) 2017.
Ka jingïoh lad jong ka Sabina ban mihkhmat sha katei ka lympung ki longkmie ba bhabriew tam ka long hadien ka jingïoh ban khur ïa ka pansngiat Mrs India Universal ha ka jingïakob jong ka Mrs South Asia India 2017 ba la pynlong da ka Ms. Aizya Joshi (Naaz Joshi) – National Director.
Ka Sabina haba ïakren bad ki lad pathai khubor ka la ïathuh ba ha kane ka jingïakob Mrs South Asia India 2017 ba dang shu dep shen la wan ban ïashim bynta haduh 26 ngut ki longkmie bad ma ka, kadei kawei napdeng kiba la shahjied ha ka top 12 bad ban rah syndon ïa ka pansngiat. Ka la ïathuh ruh ba ha ka jingïakob Mrs Universal 2017 la khmih lynti ba kin don kumba 35 haduh 40 tylli ki ri kiban ban ïashimbynta.
Kane ka longkmie kala ong ruh baka kwah ban ïalam lynti ïa ki samla ka jylla ban long kiba shlur ban ïashim bynta ha kum kitei ki rynsan ïakob namar ka ïohi, ba bun ki samla ha ka jylla kim duna ha ba ïanujor bad kiwei pat hynrei ka la pynpaw pat ïa ka jingsngewdiaw namar ba kiba bun ki samla watla ki don ïa ki sap hynrei ki shem jingeh tang namar ka jingbymkot bor ha ka jingpynlut pynsep, ka Sabina ka la kyntu ruh ïa ka sorkar ba kan khmih lem na ka bynta ki samla donsap lyngba ki lad jingïarap khnang ba kin lah ban wanrah burom na ka bynta ka jylla bad ka ri hi baroh kawei.
Phi don ban ong eiei?