Yn lur tyngeh ka AAP ban ioh kheit soh ha u 2018

Shillong 07 Nailar:
Ka Aam Aadmi Party (AAP) ka la rai ban lur tyngeh ia ka lyngkha ha kane ka jylla ban pynthikna ban ioh kheit ia u soh ha ka aiom 2018.
Ka jingialang jong ka party kaba long ha kane ka sngi Sajtian ka la shim ia ka rai ban sei kyrtong ha baroh 60 tylli ki jaka ha kane ka jylla. U nongaitkien ka AAP Meghalaya u Bah Iuklit Uriah, u la ong ba ka party ka angnud ban iakhun ha baroh 60 tylli ki konstitwensi ha ka 2018. Hynrei u la kyntait ban iateh paralok bad kano kano ka seng sain pyrthei bad ka kwah ban leit sha ka elekshon marwei.
“Ngi kwah ban jop kum ka party kaba bun tam ki MLA bad ban thaw ia ka sorkar ha ka jylla” u la ong bad bynrap, ka AAP ka la sdang ban pynkhreh ban jied briew ban sei ha ka elekshon 2018.
U la ong ba ki don 3800 ngut ki dkhot kynthei ka party na ki 8000 ngut ki dkhot ha kane ka jylla.
U la ong ba ka thong jong ka AAP ka long ban wanrah ia ka sain pyrthei kaba thymmai ban lait na ka bamsap bampong. “Ngi wad ia ki kyrtong kiba don ka lawei na ka bynta ka jylla bad ka ri” u la ong.
U la ong ba ka party ka pyrshah jur ia ka bor nabar ban wan leh jubor halor ka kam uranium. “Ka jingiasyllok ka donkam bad ki paidbah shwa ban leh ia kano kano ka kam”, u la bynrap.