Shillong: U CEM ka Khasi Hills Automous District Council u bah Latiplang Kharkongor u la phah da ka shithi sha baroh ki MDC ba kin poi ha ka jingialang ka ban long ha ka 16 tarik u kyllalyngkot 2020 ban iamir jingmut shuwa ban leit kynduh ia u Chairman ka Parliamentary Standing Commitee u Anand Sharma kaban long ha ka 19 tarik u Kyllalyngkot ban pynsngew halor ka jingthmu ban pynkylla ia ka 6 schedule.
Ha ba ia kren bad ki lad pathai khubor u la iathuh ba ka jingkhot ia kane ka jingialang bad ki 29 ngut ki MDC ka long ba kum ka KHADC ha ba ka leit ia kynduh ia ka PSC da kawei ka sur.
Na ka liang u CEM u la iathuh ba ka jingkhot ia ka jingialang kan long beit da kawei ka sur ha kaba iadei bad ka jingpynkylla ia ka 6 schedule.
Ki phang kiba ka KHADC ka kwah ban leit rah sha ka Commitee ka long ba ka KHADC kadei ban don 37 ngut ki MDC,35 ki dei ki ba shah jied da u paidbah bad arngut ki dei ki ba thung da u Lat ka jylla ha kaba kawei kadei ban long ka kynthei bad uwei u shynrang.
Bad kawei ka phang ka long ban ym shah ia kiwei ki jaitbynriew ban thung kum ki MDC.
U Chairman jong ka Parliamentary Standing Commitee u Anand Sharma un wan ha Guwahati ban iakynduh ia ki Autonomous District Council kane ka thain,ban sngap ia kaei kaba ki don ban ong halor ka jingthmu jong ka Sorkar pdeng ban pynkylla ia ka 6 schedule.
U bah Latiplang u la iathuh ruh ba mynnin ka sngi u la khot ia ka jingialang bad ki nongmihkhmat ki sengbhalang ba kynthup ia ka KSU,FKJGP,HNYF ki synjuk ki rangbah shnong ka bri u hynniewtrep bad ka Meghalaya People Labour Union ban iamir jingmut halor kane ka bynta.
Phi don ban ong eiei?