Yn lum ia ki kompeni, ban ai kam ia ki samla ka Jylla

Shillong:U symbud myntri rangbah ka jylla u bah Prestone Tynsong myn hynnin ka sngi, u la iathuh ba ka sorkar lyngba ka tnat ‘Labour’ kan sa shong jing ialang bad ki kompani shimet na ka bynta ban kyntu ia ki ban thep kam shwa ia ki samla ka jylla Meghalaya.

U bah Prestone Tynsong u la iathuh ruh ba dang shen ka sorkar Meghalaya lyngba ka tnat ‘Labour’ ka la pynmih ia ka hukum ba ki kompani shimet kiba don hapoh ka jylla ki dei ban aikam shwa ia ki samla ka jylla kum ha kane ka por ba don ka jing pakhang shnong lane ka ‘Lockdown’ ha baroh ka ri India bad ha jylla.

“Ka sorkar ka la bthah ia Commissioner & Secretary ka tnat Commerce bad Industries ryngkat bad ka jing ia don lang bad ka tnat ‘Labour’ ban lum ia ki kompani shimet kiba don hapoh ka jylla, na ka bynta ban kyntu iaki ban thep kam shwa ia ki samla ka jylla kiba don iaki sap ha ki kam bapher bapher” la bynrap u bah Tynsong.

U symbud myntri rangbah ka jylla, u la ong ba hadien ka jing wanphai ki samla ka jylla, na kiwei pat ki jylla ka ri India, lehse bun na ki samla ka jylla ki don iaki sap ban trei haki tnat bapher jong ki kompani shimet, namar kata ki kompani ki dei ban ailad shwa ia ki samla ka jylla.