Yn leit kynduh ki MDC ia u Amit Shah, pynap lypa ka KHADC ioh wan syndet ka jingpynkylla ia ka 6th Schedule

Shillong: Ka Khasi Hills Autonomous District Council (KHADC) mynhynnin ka sngi kala pynkhreh da kaba pynap lypa khnang ba ki jingai jingmut halor ka jingpynkylla ia ka khyrnit ba hynriew ka riti synshar ka ri, kin urlong, lada jia ryngkhat ba ka sorkar pdeng kan pynkylla noh ia ka.

Ka KHADC kala shong jingialang mynta ka sngi kynthup ki MDC na liangpyrshah bad liangsynshar, hadien ba kila iohi ba ka kynhun na Tipra Motha hapoh ka jingialam u Pradyot Debbarma kala pynjur ia ka jingdawa na ka tnad kam pohing ka ri ban pynsted ia ka jingpynkylla ia ka khyrnit ba hynriew ka riti synshar ka ri.
Dang shen, ka Tipra Motha ka la iasoi bad ka sorkar India ban pynbeit ia ki mat ki jura ki riewlum Tripura halor ka khana pateng, ka khyndew ka shyiap bad ka hok sain pyrthei, ka hok halor ka ioh ka kot, ka jinglong kyrpang, ka lariti bad ka ktien. Ka la dawa ruh ban ai ia ka ‘Greater Tipraland’.

U Deputy Chief Executive Member ka KHADC u bah Pynshngain N Syiem ula ong ba ka jingialang kala pynskhem ia ki jingai jingmut kiba la dep phah naduh mynshwa sha ka sorkar India lyngba ka sorkar jylla. Kine ki ai jingmut ki kynthup ia ka jingpynjah ia ka ktien Village Council hynrei ban pynneh da ka Village Dorbar, ban pynbun ia ki MDC na ka 29 sha ka 35 ngut ban jied da ka elekshon nalor 2 ngut ban shu sieh. Ka Council kala ai jingmut ban pynduh ia ka ktien jaitbynriew bym mihkhmat ne unrepresented tribe.
Kumjuh ula ong ba, ia ki nongsynshar shnong, synshar raid, dei ban leh kum ka riti dustur Khasi bad ia ki shnong kiba hap ha Municipal, dei ai da ka Town Dorbar.

U la pyntip ba ka kynhun ki MDC kan leit sha Delhi shen ha kine ki sngi ban iakynduh ia u myntri ka tnad kam pohïing halor kane ka kam.