Shillong: Ki ar seng kiba napoh ka thain War Jaintia, ka KSU bad ka FKJGP ki la pynkhreh ban leit sha ka jing ialang bah, lashai ka sngi ha Moosakia, na ka bynta ban kyrshan pura ia ka Darrang Elaka, ia ka ban pyrshah ia ka jingthmu ka sorkar ban shna projek pynmih bording na ka Wah Umngot.
U bah Laitphar Syngkrem president ka KSU-WJC bad u bah Reachingson Kongwang General Secretary ka FKJGP-WJC, ki la ong ba kine ki ar seng ki ieng ha ka nongrim ban pynneh pynsah ia ka mei mariang, namar shibun ki paitbah ki ioh jingmyntoi bha na kane wah umngot naduh ki nongkhwai doh, ki nongrep bad khamtam ka kam tourism. “Mynta ngi sakhi baroh ba ka kam tourism ka ai jingmyntoi shisha ia ki paitbah ym dei tang ia kiba napoh ka thian Elaka Darrang, hynrei shibun ki piatbah na kiwei pat ki shnong kum ka Amkoi, Nongbareh, Padu, Kudengrim ki ioh jingmyntoi ha kiba bun ki liang ha ka kam tourism” ong ka kyrwoh.
Ha ka jaka ban shna projek bording, ia ka ban pynjot ia ka lawei kane ka wah, ki ar seng ki ai jingmut ia ka sorkar ba kan kham bha shibun eh ban nang pynbha ia ki surok, ki lynti synkieng iaidkjat, ki painkhana bad kumta ter ter ha shi lynter kane ka wah, khnang ba ka kam tourism kan kiew bha shait shait bad ka lawei ki khun samla kin iohkam iohjam bad ban ai scheme ia ki paitbha khamtam ia ki khun samla ban seng ki kam khaii khaba ha ka liang ka kam tourism.
Baroh ka pyrthei ka bna bha ia ka nam ka wah Umngot kum ka crystal and clear water, pynban lada ka sorkar kan ioh lad ban leh ia kane ka kam, tikna kan don beit ka jingktah ia kane ka wah, bad ka nam ka burom jong ka kan sa jah noh na histori jong ka pythei baroh kawei. Horkit hordang, kine ki ar seng ryngkat bad kiwei pat ki kynhun kiba pyrshah, kin nym ailad satia ia ka sorkar ban ioh shna ia kane ka projek.
Phi don ban ong eiei?