Shillong:Ka Samla Iri kmen Shabong, kaba dei shnong trai na Madan Bidaw kaba ha Sohiong Constituency, kan sa leit ban shibynta ha ka lym pung International Arm Wrestling Championship, ka ban sa long ka nongbah Turkey ha u bnai Risaw mynta u snem.
Ka kmie jong kane ka samla, ka kong Sherita Shabong haba kren sha ki lad pathai khubor ha ka sngi Ba ar ha shillong Press Club, ka la buh ka jingkyrpad ïa ki paidbah nongshong shong jong ka jylla khamtam eh ïa ki nongïalam seng bhalang bad ki nongialam jong ka sorkar bad ïa kito ki riew kylluid mynsiem ba kin ïarap lem kum ka jingiarap pisa khnang ba ka Samla Irikmen Shabong, kan ioh ban shim bynta ha katei ka lympung khnang ban wanrah ïa ka nam ka burom jong ka jylla bad Ri hi baroh kawei, lada ki paitbah ki nongsyñiang da kaba kylluid mynsiem namar katei ka samla ka dei ka khun ka duk ban ïa shim bynta ha kine ka Lympung.
Ka kmie ka kong Sherita, ka la ïathuh ba ka jinglut jingsep na bynta ka khun Samla Irikmen ban leit sha ri Turkey kan poi kumba 3.22 lak bad ka la ong ba kane ka jinglut kaba kum ka ïing ka sem kim kot bor shuh ban pynmih na ïing.
Ka Kong Sherita ka la phla ruh, ba na ka liang jong ka, ka la phah shithi ban pan jingïarap na ka sorkar bad kumjuh na kiwei pat ki tnad treikam bapher bapher bad ki corporation, hynrei tat haduh mynta ba ka phah shithi kam pat shym la ïoh jubab eiei.
Da ki kyntien myllung bad sngew synei ka kmie, ka la kren ba dei ka jingkut lad kum ka kmie da i bor ba rit kan ïaï trei shitom, hynrei kum ka kynthei kam lah pynmih da ki phew lak, ban pyndap kaba pynlong ïa ka kmie kum ka ban kyrpad da ka jingsngew rit ïa baroh kiba don lad ba kin synïang lem namar ka kmie kum ka kmie kam kot bor shuh bad lada kam ïoh jingïarap kim don da kiwei pat ki lad satang ban pynpep noh ïa ka khun jong ka ban leit shim bynta sha katei ka jingïakop ka ban long naduh ka 14 tarik Risaw bad kan neh kumba ar taïew eiei ong ka Kong Sherita.
Ka la ong bad pynsngew sha ki paitbah bad ka sorkar ba ka pisa ki donkam ban ïoh ha shuwa ka 20 tarik mynta hi u bnai, namar 20 tarik kin hap thep ïa kane ka pisa, ka la ong.
Ka Kong Sherita Shabong, ka la ïathuh ba kane ka jingïoh leit shim bynta ha katei ka Lympung International Arm Wrestling Championship ka Khun jong ka, ka Samla Irikmen ka dei hadien ba ka la ïoh khur ïa ka takma rnong kaba long ha Hyderabad ha une u bnai ba ladep.
Phi don ban ong eiei?