Yn leit iakhih u samla marwei sha Delhi ban dawa artikil 371

Shillong:U samla Reginal Shylla na Khliehriat, East Jaintia Hills, ula pynkhreh ban leit iakhih sha nongbah Delhi ban dawa ban pyntreikam ia ka artikil 371 ha jylla Meghalaya ban ioh ban tih dewiong, lada ka sorkar jylla kam lah ban leh ia kane lane ka sorkar pdeng kam ai ia ka jingdawa.

Ka artikil 371 ka dei kaba pynkup bor ia ka jylla ba ki ain ka parliament kim ym treikam halor ki katto katne ki sobjek khlem ka jingmynjur shwa ka sorkar jylla.
Haba kren mynta ka sngi, u samla Reginal u la ong ba ka daw kaba pyllong ia u ban wan pyllong ia ka jingiakhih ha mot u Kiang Nangbah, hajan Civil hospital, Shillong, ka long ba kam don ka Standard Operating Procedure (SOP) kaba pynmih ka sorkar MDA ban aplai license, kaba ong ba donkam 100-hectare ka jaka ban ioh tih dewiong, bad kane ka la teh ka la khum ia ki trai par dewiong kiba don duna ia kane.

U la ong ba katkum ka section 6 ka ain Mines and Minerals (Development and Regulation) (MMDR) Act kam don satia ka kyndon ba kaba ong ba donkam 100-hectare ka jaka ban ioh tih dewiong. U la ong ba ha Assam, ha Nagaland, ki lah ban leh ia ka rat hole mining ne ka jingtih dewiong krem khnai, namar ba ka Nagaland ka don ka artikil 371A bad ka Assam ka ioh ia ka artikil 371B, ha kaba ki ain ka sorkar India kim lah ban tuklar ia ki ain ka jylla. Katba ka jylla Meghalaya kam don satia kane ka artikil.

U la ong ba lada ka sorkar jylla bad ka sorkar pdeng ka don ka mon, kam don jingeh ban ai ia ka artikil 371 ha kane ka jylla.
Ha ka jingshisha u la pynkhreh ban wan iakhih ryngkat ki paidbah hynrei ka bor district ka East Khasi Hills ka la weng noh ia ka jingiakhih namar ba ka sorkar ka la khot iakren lyngba u secretary ka Geology and Mining ha ka 1 tarik Naitung ban wan.