Yn leit Delhi U MR, ban iakren halor ka iakren iasuk bad ka HNLC

Shillong: Ban pyniaid shakhmat ia ka jingiakren ia suk hapdeng ka seng kieng atiar Hynniewtrep National Liberation Council (HNLC) na ka liang u Myntri rangbah la shai ka sngi un leit sha Delhi.

Haba ia kren bad ki lad pathai khubor, na ka liang u Myntri rangbah u Conrad K Sangma u la ong ba hadien ba na ka liang ka seng HNLC ka la phah ia ki kyrwoh ha ki lad pathai khubor halor ka jingtyrwa ban ia kren ia suk na ka liang ka sorkar ka la shim khia ia ka ne ka bynta.

U la bynrap ba na ka liang jong ka sorkar jylla ka ladep ban jied ia ki kyrteng ban long kum u ksiang na ka bynta ban pyniaid shakhmat ia ka jingkren.

U Myntri rangbah u la ong “Hadien ba na ka liang ka sorkar jylla ka la ioh ban pdiang ia ka kyrwoh na ka liang ka HNLC lashai ka sngi ngan hiar sha Delhi”. U la bynrap “Ha kane ka jingleit sha Delhi ha ryngkat ka jingiakynduh ia kiwei pat ki ophisar bad ki minister ngan kynduh ruh ia ki ophisar ka MHA ha kaba ngan ia kreh halor kane ka jingtyrwa ban ia kren ia suk bad ka HNLC”. U la ong ba kane ka jingiakren kan long ban ia syllok kumno ban pyniaid shakhmat ia kane ka bynta bad tang laioh ia ka jingmynjur na ka MHA, ngan sa shim ia ka sienjam ban pyniaid shakhmat halor kane ka bynta. Haba kylli halor ka mat u pud u sam u Myntri rangbah, u la ong ba hadien ba na ka liang ki ar tylli ki jylla, ki la dep ban phah ia ki kaiphot jong ki sha ka MHA bad na ka liang ka MHA ka dang bthah ia ka Survey of India bad kiwei ki tnad ban ai ka kaiphot ha ka ba ia dei bad kane ka bynta .

“Nga tharai ba mynta ki dang bishar ia kine ki kaiphot ha ka ba nga tharai sa tang ha kine ki khynniat por, na ka liang ka MHA kan sa khot ia ngi” la ong u Myntri rangbah.