Yn leh tyngeh ka Umsaitsning Lad Mawrong, lada die sikret sha kiba 18 snem

Nongpoh:Ki nongialam shnong ha ryngkat ki dkhot ka Village Defence Party (VDP) jong ka shnong Umsaitsning Lad Mawrong, hynrei ka sngi ki la leit ban kynduh ia baroh ki nongshong dukan kiba don hapoh katei ka shnong bad katei ka jingleit kynduh jong ki ia kitei ki nongshong dukan, ka long ban leit maham ia ki ba kim dei shuh ban die sikret ne ia kino kino ki jingdih ba pynbuaid sha ki khynnah kiba dang hapoh ka 18 snem.

Katei ka jingleit jurip ia kitei ki dukan, ka la jia ruh hadien ba ki nongialam shnong lem bad ki VDP, ki la leit ban tah da ki kynja Poster sha baroh ki dukan kiba don ha katei ka shnong, kaba ki la maham tyngeh ba kim dei ban die ia kino kino ki sikret ne biri sha ki khynnah hapoh ka 18 snem, ha kaba ki la buh ruh ia ka jingmaham ba lada ki leh pyrshah kin sa shah dain kuna haduh T. 1 lah bad ka shong king byndi 7 snem, kata katkum ka Juvenile Justice Act Section 77 ka sorkar India.

Ha katei ka sngi kaba kitei ki nongialam shnong lem bad ki VDP, ki la lap ba baroh ki nongshong dukan ki la kohnguh ia ki jingbthah ka shnong bad VDP, ha kaba kim ju die sikret ne biri sha ki khynnah, ha kaba wat ki nongshong dukan hapoh katei ka shnong, ki la ong ba ki long kiba kloi ban iatrei bad ka shnong, khamtam eh haba ki la lap ba katei ka jingleh ka shnong bad VDP, ka long na bynta ka bha ka miat ia ki khynnah.

Hadien katei ka jingleit jurip ia kitei ki dukan, u Bah Frankie Nongrum, Rangbah shnong ha ryngkat u bah Titsuk Kharbani, President ka VDP, ki la ong ba ka daw kaba la pynlong ia ka shnong bad VDP ban shim ia katei ka sienjam, ka long na bynta ka jingbha ki khynnah hapoh ka shnong hi baroh kawei bad ba kin lait na kaba dih ia ki jingdih ba pynbuiad.
Ha kawei pat ka liang, ki la pynpaw ia ka jingbynniaw, ba ka sorkar watla ka la pynmih ia ka ain ban khang pyrshah ha ka ban die sikret ne biri sha ki khynnah kiba hapoh 18 snem, hynrei ha ka jingshisha pat ba katei ka ain kam treikam satia, namar ki don shibun ki dukan kiba pynkhien ia katei ka ain bad kiba ai beit haba wan thied sikret ne biri ki khynnah kiba dang rit ka rta.

Namarkata, na ka liang ki nongialam shnong bad VDP na ka shnong Umsaitsning Lad Mawrong, ki la kyrpad ia ka sorkar jylla kumjuh ruh ki bor distrik ba ki dei ban shimkhia halor katei ka phang bad ba ki dei ban leh da kaba tyngeh lada lap ia ki dukan kiba die sikret sha ki khynnah rit, namae lada lah ban leh tyngeh ka jingmyntoi ka dei na bynta ki khynnah bad ba kin ioh ia ka met kaba koit ba khiah.