Yn leh da kaba tyngeh ia 5ngut ki MLA kyntiap seng, ong U President MPCC

Shillong:Ka Meghalaya Pradesh Congress Committee (MPCC), ka la byrthen ban leh da kaba tyngeh ia ki 5ngut ki MLA jongka, kiba leit kyrshan ia ka sorkar MDA, kaba iatrei lang bad ka BJP.

U Ma Vincent Pala, President ka MPCC, ula iathuh, ba un thoh sha ka All India Congress Committee (AICC), ha kaba ula pynsngew ba ka jingkwah jong ki nongialam seng, ka long, ba dei ban pyn saja da kaba tyngeh ia kitei ki MLA kyntiap seng.

“Ban pynshi tom ia ki, ka dei shabar na ka bor jong nga, hynrei ka shong ha ki nongialam kiba don ha ka AICC” ong U Ma Pala bad ula ong ruh ba ka AICC ruh, ka don ia kajuh ka jingthmu ban sympat tyngeh ia kitei kiba leit kyrshan ia ka sorkar MDA. La ong ba ia kitei ki MLA, yn pan jubab shwa bad hadien katei yn sa beh seng ia ki, lada kam biang ka jubab jongki.
Ki nongialam ka MPCC, ki la iakynduh ruh mynta ka sngi, ia U Bah Mohendra Rapsang bad U bah Mayralborn Syiem, kiba dei ki arngut ki MLA, kiba dei na kitei ki 5ngut, kiba la leit hajir halor ka jingkhot jong ki heh ka MPCC.
U Ma Vincent, u la ong ruh “Ngam kwah ban iania bad ka nongialam jong ka CLP ia kaei ba ka kren, hynrei ki dei ban sngewthuh ba ka Congress ka don la ki rule ia kaba kum ki MLA, ia kaei kaba ki lah ban leh bad kaei ka ba kim lah ban leh”.

U la bynrap ruh “Kane kam dei ka sien ka ba nyngkong ba kan jia, hynrei ki la tip bad iohi ia kaba la jia ha kiwei pat ki jylla kum ka Nagaland”.
U bah Pala u la ong ruh ba ka jingkwah jong ki bor ba halor ban pynshitom ia kine ki MLA kam dei namar ba ki la rai ban pyniasoh bad kano kano ka party, hynrei ka dei namar ba ki MLA ki la iaid lait ia ki kyndon jong ka party ha kaba ki khlem pyntip ia ki bor ba halor jong ki.
Haba kylli u bah Vincent u la ong “Ha ki bnai ba la dep ka rai ban ai ka jingkyrshan ia ka sorkar, ki bor ba halor ki la sngap namar ba ki la rai ban kyrshan halor ki mat jong u paidbah, hynrei mynta kane ka pher ha ka ba ki la iaid lait ia ki bor ba halor jong ki” .