Yn kyrpad ïa ka sorkar pdeng ban wanrah ïa ka AIIMS ha jylla, ong ka kong Ampareen

Shillong:Ka sorkar jylla ka la rai ban kyrpad ïa ka sorkar pdeng ba kan wanrah ïa ka All India Institute of Medical Science (AIIMS) ha jylla Meghalaya.

Ka myntri ka koit ka khiah ka kong Ampareen Lyngdoh ka la ong, “Namar ka kyrteng AIIMs ka mut shibun kiei kiei ki nongpang na ka thaiñ, ngi la ïakren ïa kane ka kam, bad u Myntri Rangbah ka Jylla bad haoid ngin sa rah ïakren bad ka Sorkar Pdeng. U Myntri Rang bah ula pynkhreh ïa ka DO letter sha u Myntri ka Koit ka Khiah ka Sorkar India ban pyni ba ngi ruh ngin long kiba donbok ban ïoh ïa kum kane ka Institute hapoh ka Jylla Meghalaya”.

U Nongïalam ka Liang Pyrshah u Bah Ronnie V Lyngdoh ula ong ba ka AIIM ka dei tang ka kyrteng hynrei ka don ïa ka bor treikam bad ka jingdon ïa kum kane ka Institute hapoh ka Jylla kan ïarap shibun eh ban pynsting ïa ka jinglut jingsep ki paidbah na ka thaiñ.
Katkum ka jingong jong u, la kyrpad ïa ka Sorkar ban ïakren ïa kane ka kam naba ka Ministry ka kwah ban kyntiew kyrdan ïa ka Regional Institute of Medical Sciences (RIMS) sha ka Institute kum ka AIIMS. Ula ong ba ka Sorkar ka lah ban ïasaid ïa kane namar ka Jylla ka la don lypa ïa ka North Eastern Indira Gandhi Regional Institute of Health and Medical Sciences (NEIGRIHMS).

Halor ka jingthmu ban wanrah ïa ka Meghalayan Medical Drugs and Service Limited (MMDSL), ka kong Ampareen ka la ong ba ka MMDSL ka dei kaban pynkhlaiñ ïa ka rukom thied dawai bad ban pynbeit ryntih ïa ka jingsam dawai, ban pynthikna ïa ka jingïaid beit ki jingsam dawai, ban sumar ïa ki tiar sumar ha ki jaka ai jingsumar ha Jylla, ban pyllait tender, billing bad kiwei kiwei khnang ban ïaid beit ïaid ryntih ka jingsam dawai ha Jylla.
Ha kajuh ka por haba shimkhia ïa ka jingsngewkhia ba la pynpaw da ki dkhot halor ka jingkynrei u drok, ka Myntri ka la pyntip ba ka Sorkar kan sa wanrah ïa ki de-addiction centre ïa ki kynthei hapoh ka Drug Reduction Elimination and Action Mission (DREAM) project.

Katkum ka jingong jong ka, kam pat don satia kano kano ka de-addiction centre na ka bynta ki Kynthei hapoh ka Jylla.
Shwa kane, u MLA na Mawlai u Bah Brightwellstar Marbaniang ula kyrpad ïa ka Sorkar ban buh ïa ka de-addiction centre ha ka constituency jong u, kaba la kylla long kawei na ki drug hotspot ne ka jaka ba jyllei eh u drok ha ka Jylla.