Shillong:Ki nongialam ka BJP na kane ka jylla Meghalaya ki la pynkhreh ban leit iakynduh kyrpang ia u myntri rangbahduh ka ri u Narendra Modi bad ruh ia u myntri kam pohiing ka ri u Amit Shah nalor kiwei ban kyntu ba kin pynsted ban mynjur ia ka Bengal Eastern Frontier Regulation 1873 ne ka Inner Line Permit (ILP) ba kan treikam noh ha Meghalaya bad ban pyllait pura ia ka Citizenship Amendment Act (CAA) 2019.
Haba kren bad u Bah Sanbor uba dei u MLA ka BJP, ula iathuh ba la dep phah ha u myntri tnad ialehkai ka ri u Kiren Rijiju ba un pynbuh por bad ka sngi ban leit kynduh ia u Modi, Amit bad kiwei ki heh BJP ha Delhi hadien ka Khrismas mynta u snem.
“Da kynhun ka sorkar Meghalaya Democratic Alliance (MDA) ruh ngin leit kynduh bad na ka liang ka party ruh ngin leit kynduh kyrpang”, la ong u bah Sanbor.
U bah Sanbor ula ong ba kane ka jingleit kynduh kan long ban kyrpad ia ki nongialam ka BJP seng kmie ban pynkloi ban mynjur ia ka ILP kumba la dep rai ka ïing dorbar ka jylla dang shen bad kawei ka long ban pyllait pura ia ka CAA ia ka jylla Meghalaya.
U bah Sanbor ula ong ba ma u bad u bah AL Hek kin leit kynduh lang da ka kynhun MDA bad hadien kin leit kynduh bad kiwei ki nongialam ka BJP na Meghalaya ia kane kajuh ka kam.
Lah ban kdew ba ka kynhun MDA ka lah ban leit kynduh ia u myntri rangbahduh u Modi bad ia u myntri kam pohiing u Amit Shah halor kajuh ka kam. Ha ka jingshisha, ia ka rai ba la shim da ka ïing dorbar la dep phah sha ka sorkar pdeng.
Ki Kam shalak khlieh suda