Shillong: Mynta ka sngi ka la don ka jingialang Executive Committee (EC) ka Khasi Hills Hills Autonomous District Council (KHADC) ban ia kren halor ka mat kaba ia dei bad ka Them Metor. Hadien ba la wai katei ka jingialang u Chief Executive Member (CEM) ka KHADC u bah Pynshngaiñ N Syiem u la ong ba la shim ia ka rai ba ka District Council kan khot ia u Acting Syiem ka Hima Mylliem ban ia peit ia ki kot ki sla kiba ia dei bad ka jinglong trai ka Hima Mylliem ia ka Them Metor bad ban pynbiang lut ia baroh ki jingdonkam kaba ia dei bad katei ka jaka bad ia kitei ki kot ki sla bad ki ripod kin phah sha ka High Level Committee (HLC) ba la thaw da ka sorkar ban leh ia kaba donkam. Halor ka jingai pata khyndew ka Hima Mylliem ha Them Metor u bah Pynshngaiñ u la ong ba ka Hima Mylliem ka la leh bakla da kaba ai pata khlem da leit ban pynshisha bad ba ka khlem ia pynbeit bad ka Municipal.
