Yn khot jingïalang ka tnat Urban ban kren biang halor ki Harijan, ong U SMR

Shillong:U Symbud Myntri Rangbah ka Jylla (DyCM) ba khmih ïa ka tnat pynroi sor, Bah Sniawbhalang Dhar, ula khot ïa ka jingïalang lashai ka sngi Balang ban shong bishar halor ki project ba dang ïaid jong ka Tnat nalor ban ïasyllok ruh halor ka jingpyn kynriah ïa ki 342 tylli ki Longïing na Them Metor, Them Ïew Mawlong.

“Ngan sa shong bishar kam halor ka jingïaid jong ki project ka tnat kynthup ka Smart City Project lashai ka sngi,” ong u Bah Sniawbha haba ïakren bad ki nong thoh khubor.
Ula ong ba katto katne na ki project ki kynthup ïa ka Ïew Laitumkhrah, Ïew Polo, Smart road bad kiwei kiwei. “Ngan sa tip ïa ka jingïaid ka kam bad ka jinglut ka pisa jong kine ki project hadien ba nga la shong jingïalang bishar kam,” ula bynrap.

Haba pynpaw ba ki project bapher bapher ki don la ka jong ka por ban pyndep, u Symbud Myntri Rangbah ula ong, “Ngan pyrshang ban leh ïa kat kaba lah ha kine ki sngi ban wan ban pyndep ïa ki project ha ka por ba la buh”.
Ula bynrap ba ka Jylla kam don jingeh satia haba phai sha ka jingioh song pisa bad ong ba ka jingwan jong ka pisa na ka Sorkar Pdeng bad ka Sorkar Jylla ka la ïaid beit ïaid ryntih.
U Bah Sniawbha ula pyntip ruh ba un sa khot ïa ka jingïalang ha ka kyrdan jong u, ban ïakren bad ïasyllok halor ka jingpynkynriah noh ïa ka Them Metor na Them Ïew Mawlong.

“Ngan sa khot ïa kane ka jingïalang ha ka kyrdan jong nga kum u Myntri Pynroi sor. Hadien kane, u Chairman ka High Level Committee un sa khot ïa ka jingïalang bad ngin sa shim ïa ka rai halor kane ka kam,” ula ong haba bynrap, “Lashai ka sngi, ka jingïalang kan long ha ka kyrdan jong nga bad hadien kane ngin sa shong kum ka Jylla. Hooid, ngi hap ban khot ïa ki (Harijan Panchayat Committee). Ka Ïingkashari ka la ai ïa ka por bad ngi kwah ban pynbeit noh kham kloi kat kaba lah”.

U Bah Sniaw bha u pyntip ruh ba ka Jowai Beautification project ka dang ïaid shakhmat bad haduh 90 % na ki project shna surok ha kane ka sor kila dep lut. Katkum ka kaiphod, ki surok kin dep hapoh kine ki 10 sngi ban wan.
Haba phai pat sha ka Tnat Home (Jail), u Bah Sniawbha ula ong ba um pat ïakynduh satia ïa ki Ophisar jong ka Tnad. Ula ïathuh dang shen ba ka Sorkar Jylla ka la thmu ban wanrah ïa ka Central Jail hynrei ïa ka jingtip ba bniah halor kane ka jingtyrwa yn sa tip hadien ba la shong ïa ka jingïalang bishar kam ka ban long la shisngi.