Shillong: Ka tnad pynroi ka jylla, shen kan sa khot sha ka miej iakren bad ki synjuk ki nongshong dukan bad die jingdie ha rud surok bad lynti iaid kjat (Hawkers’ and Vendors’ Association) ka nongbah Shillong.
Ia kane la shim hadien ba la shim ia ka rai ba long hynnin ka sngi ba la donlang u myntri rangbah ka jylla, u Conrad K Sangma, u myntri sorkar jylla ba dei peit ia ka tnad Urban Affairs, u Bah Hamlet Dohling, u DGP, ki ophisar ka tnad pulit, u Principal Secretary ka tnad Urban, u Bah DP Wahlang, u CEO ka Shillong Municipal Board lem bad kiwei kiwei.
“Ka jingiakynduh ka long ban iatai bad kiba shong dukan bad die jingdie ha rud surok bad lynti ïaid kjat bad ka jingpynjakhlia”, la ong u Bah Hamlet haba ia kren bad ki nongthoh khubor mynta ka sngi.
U la ong ba ka sorkar kan iakynduh bad iakren ia ki Synjuk ba dei peit ia ka bha ka miat kiba die dukan bad shong die jingdie ha rud lynti ïaid kjat ha shwa ban shim rai na ka bynta kiba im ja da kaba die jingdie ha rud surok bad lynti ïaid kjat bad katno ngut ki don.
“Ngim kwah ban leh kyrkieh ha kaba shim ia ki sienjam ban weng ia ki jingeh bad ngim kwah ban tyngkhuh bad ki bor ka Ing Bishar namar kumba ngi tip ba ka mat ia kren ka don ha Ing Bishar bad shwa ban ai jubab sha ka Ing Bishar ngin ia kynduh bad ngin ia kren shwa bad ki jingeh kiba u paidbah u ia kynduh”, la ong u Bah Hamlet.
U bah Hamlet u la ong ba ka sorkar ka tip ba u paidbah u don ka hok bad khnang ban tip ia ki jingeh ki ba shong die jingdie ha rud surok bad lynti syngkien ngi kwah ban shim ia ki lad ki ban ym ktah pat ia ka jingbit jingbiang uba bun balang.
Ha kaba iadei ka jingpynjakhlia, une u myntri u la ong ba ka sorkar ka mana ban bret jakalia ne ki ki jingpynjaboh ha ki lynti syyngkien.
“Ngi la rai ba na ka liang ka sorkar buh kan buh kyndon ban pynshitom ia kiba pynkhein ia ka ain ha kaba pynjaboh ia ki lynti syngkien. Ki bor pyniaid district bad ka tnad pulit ryngkat ka Shillong Municipal Board kij shim khia ban peit bad pynshitom ia kiba pynkhein”, u la ong.