Yn khang dam noh, ka sorkar ia ki tnad bym larkam

Shillong, 29 Iaiong:
Ka sorkar jylla ka don ka jingthmu ban khang kdam noh ia baroh ki tnad bym larkam kiba long tang ka jingban ia ka jingkit jongka.
“Ngi dang thaw ia ki lad ki lynti ban khang noh ia baroh ki tnad bym larkam ba la buh da ka sorkar”, la ong u Myntri Rangbah u Mukul Sang ma mynta ka sngi.
U la ong ba ka sor kar ka la khang ia ka Electronic Corporation Limited (ECL), bad ka don ka jingthmu ban khang noh sa ia ka Bamboo Chips Corporation (BCC) namar ba kane ka dei tang ka jingkit ba khia ia ka sorkar khlem pynmih eiei.
“Ka sorkar kam lah ban bteng ban ai jingkyr shan ia ki namar ba kim lah ban pynmih eiei nalade. Kan bha ba kan pynkut noh ia ki”, la ong u Myntri Rangbah.
Ha kajuh ka por, u la ong ba ka sorkar ka dang shim ia ki lad ki lynti ban pynkhie im ia ka Meghalaya Minerals Development Corporation (MMDC).
“Ka MMDC kan long kaba donkam hadien ba ka sorkar kan pyntreikam ia ka Mining Policy. Ka MMDC kan sa ioh khajna bun bha hadien ba pyntreikam ia ka Mining Policy”, u la ong.
U Myntri Rangbah u la ong ba ka sorkar kan leh kumjuh ia ka Meghalaya Industries Development Corporation (MIDC) ba kan khie im biang na ka jingtlot jongka.
Halor ka jingkylli aiu ka sorkar kan leh ia ka MTC, u la ong, kane ka de ka atiar jong ka sorkar kaba lah ban pynmih khajna lada pyniaid da ka rukom kaba biang.
“lada ki briew ki pyniaid ia ka kam khaii da ki kali, ki ioh nong, balei pat ka MTC kam lah”, la ong u Mukul bad um iahap ban khang noh ia ka MTC.