Yn jurip ki nongialam ka KYWM bad u SE PWD (Rd) ia ka wah Myntdu

Jowai:Myn hynnin ka sngi Balang, u Deputy Commissioner ka West Jaintia HIlls u ma LSN Garod Dykes u la khot jingialang ia ki nongialam ka seng iada wah Myntdu kaba la tip kum ka ‘Khuid Ya ka wah Myntdu’ bad ruh ia u Superinteding Engineer ka tnad PWD Road, Jowai ban iakren halor ka jingdonkam ban iada ia ka wah Myntdu kaba dei kawah kaba bsa um bam ia ka shnong Jowai baroh kawei.

Ha kane ka jingialang la shim ia ka rai bad ka seng ha ryngkat u SE ka tnad PWD (Rd), kin hiar ban leit jurip kyrpang ia ka jingbret ia ki khyndew na u surok Jowai by-pass ha ka thain Mihmyntdu da kaba pyntuid sha katei ka wah.

Ka jingbret ia ka khyndew ka la pynlong ban khang lynti ia katei ka wah bad ka la pynjaboh ruh ia ka um kaba ki paidbah ka shnong Jowai ki pyndonkam jan man la ki thliew iing.