Yn ithuh ka KHADC, ia ki NOC ka Dorbar Shnong, ym u Rangbah Shnong

Shillong,30 Lber:
U Chief Executive Member ka KHADC u bah Ardent Basaiawmoit u la ong ba nangne shakhmat ka KHADC kan ym ithuh shuh ia ka jingai No Objection Certificate ( NOC) u Rangbah Shnong ia ki bar jylla na ka bynta ba kin ioh ia ka Trading License, hynrei u la ong ba nangne shakhmat kan ithuh noh tang ia ka NOC ba la myn jur da ka Dorbar Shnong. “ Ngin ym pdiang shuh ia ki NOC ki Rangbah Shnong, u Rangbah Shnong u donkam ban ioh ia ka jing mynjur ka Dorbar Shnong shuwa ban ai NOC” ong u Bah Ardent ha ka sngi saitjain ba la dep. U CEM u la ong ba ka KHADC ka la ioh jingtip ba ki don bun ki Rangbah Shnong kiba ai NOC sha ki bar jylla khlem ka jingtip ki Dorbar Shnong hynrei u la ong ba ia mynta ka KHADC kan ym pat leh eiei ia kita ki Rangbah Shnong hynrei ka la bthah ba nangne shakhmat kim dei shuh ban leh kumta.
Ha ka juh ka por u bah Ardent u la ong ba ka KHADC kan ym ai Trading license shuh sha ki bar jylla lada ki pan ia ka kam ba ki trai jaka ki lah ban leh, bad u la ong ruh ba ka KHADC kan mait noh wat ia kito ki Trading License jong u bar jylla kaba dei na ka bynta ki kam ba ki trai jaka ki la laah ban leh.
Shuh shuh u CEM u la ong ba katkum ki kyndon ain ka Non-Tribal Regulation Act of 1959 , ka kren shai ba ka Council kam lah ban ai Trading License sha ki bar jylla lada ka dei ka juh ka kam kaba ki riewlum ki lah ban leh.U la ban biang ba ha ka Clause 3 A (b) jong katei ka Act la ong ba lada don ki riewlum kiba trei ia katei ka kam , bad lada ki kwah ban iai bteng katei ka juh ka license kan dang iaid.
Kham mynshuwa u EM incharge jong ka Trade u bah Latiplang Kharkongor u la ong ba ka Council kan sangeh noh shisyndon ia ka jingai trading license sha ki bar jylla, bad u la ong ba ka dei ruh ka mat treikam jong ki seng riewlum ha ka elekshon ba la dep khamtam ha ka kam kaba ia dei bada ka khaii pateng kumjuh ruh ha ka labour license kaba la bat da u MDC jong ka KHNAM u bah James Ban Basaiawmoit, u la pynkynmaw ruh ba ki seng riewlum ha kane ka elekshon ba la dep ki la buh ruh ia ka jingdawa na ka bynta ban pyntreikam noh ia ka ILP ha kane ka jylla. U bah Latip u la ong ruh ba ia mynta ka Council ka dang pan jingshai na baroh ki saw district haduh katno ki Trading License la dep ban ai haduh mynta.