Yn ioh jaka thep vote biang ha Langpih

Nongstoin, 24 Jymmang:
Ha ki laiphew hyn niew snem bala leit noh hadien ba ka shnong Langpih kala duh noh ia la ka jong ka jaka thep vote (Polling Station), ha katei ka shnong kata da kaba shah pynkynriah noh sha ka shnong Mawsikar, mynta ka kynti yn wan phai biang katei ka jaka thep vote sha Langpih, bad ki shnong kiba hap ha katei ka jaka the vote (Polling station) ki kynthup naduh ka shnong Mawdiangsnam, Umyiap, Umwali, Umwahsiang, Langpih Nongma, Umtap, Mawlan, Nongmawlong, bad kiwei kiwei ki shnong.
Katkum ka jingioh jingtip jong u nongthoh khubor na ki katto katne ki briew kiba dei peit ïa ka Election hapoh ka Distrit ki la ong ba ka sorkar ka la dep rai ba yn buh biang ïa ka jaka thep vote (polling station) ha Langpih bad ia katei la dep ban pynbeit bad ka sah satang ban phah mynjur ha ka Election Commission jong ka Ri India bad yn sa pynbna ruh sha ki paitbah
Na ka liang jong u nongthoh khubor u la ioh lad ruh ban twad jingmut na ki riew rangbah bad riew tymmen katei kathain ha kaba iadei bad katei ka jingduh noh ka Langpih ia ka jaka thep vote bad na ka liang ka jong ki, kila iathuh ruh da kaba ki ong ba hadien ka jingwan pynklumar ki pulit ka Assam kata ha u snem 1979 ki paidbah nongshong shnong katei ka thain kila phetwir bad phet krad noh namar ka jingsheptieng bad kila leit ruh ban shong shnong noh shipor sha ka shnong Kyndongei bad naduh katei ka por ka Langpih kala duh noh ia katei ka jaka thep vote ka jong ka.
Ym tang kata ki la iathuh ruh ba ha shuwa ka election ha un snem 1981 -82, ki paitbah jong ka thain Langpih ki la leit phai biang sha la ki shnong ki thaw hynrei ia katei ka jaka thep vote na Langpih la pynkynriah noh sha ka shnong Mawsikar bad kaba la neh ruh haduh kine ki snem kiba mynta, bad na ka liang jong ki paidbah katei ka thain kila pynpaw ruh ba ka jingdon jong katei ka jaka thep vote ha Mawsikar ka buh jingeh kaba khraw ha man ba long election bad na ka liang ka jong ki paidbah katei ka thain ki la dawa na ka sorkar na kapor sha kapor ba kan pynphai biang ïa ka polling station sha Langpih.