Shillong,21 K’lyngkot:
Ki samla pule ka thain shatei Lam Mihngi kiba pule ha ki 30 tylli ki jaka pule kiba don hapoh ka Ri India kin ioh ia ka scholarship kaba shispah na ka shi spah, katei ka scholarship scheme ka dei kaba la tip kum ka Brilliance. La pynbna ba katei ka scheme ka dei tang na ka bynta ki samla pule kiba la pyndep ia ka klas XII bad kiba thmu ban pule shabar jong ka NE ha ki jingpule bapher bapher jong ki. Ka jingthmu ba la pynbna ia katei ka scholarship ka dei namarba ki don ki samla pule kiba shem jingeh ban bteng ia ka jingpule jong ki watla ki don ka jingthmu ban pule ha ki lain bapher bapher.
Haba kren sha ki nongthohkhubor, u nongshem ia katei ka Skill Tree Knowledge Consortium u Mr.Shekhar A.Bhattarcharjee u la ong ba kane ka scheme ka dei ka lad na ka bynta ki samla pule jong ka thain shatei Lam Mihngi ba kin bteng ha ki jingpule jong ki khlem kano kano ka jingeh na ka jingduk. U la ong ba katto katne ki jaka pule kiba katei ka scheme ka treikam ki kynthup ia ka Jakran Lake City University,Bhopal, ka Global University kaba don ha Mirzapur, IMI, Bhubhaneshwar, ka imperial College kaba don ha Bangalore, Garden City College kaba don ha Bangalore bad kiwei pat ki jaka pule ba paw nam ha ka Ri.
Shuh shuh halor katei ka scheme shuwa ba yn pyntreikam ia ka na ka bynta ki khynnah pule ka thain shatei Lam Mihngi, u Shekhar u la ong ba ka kynhun jong u ka la wad jingtip kaba thikna ia ka jingdon ki khynnah pule ba la pyndep ia ka klas XII ha baroh 7 tylli ki jylla, u la ong ba la shim jingkhien ruh ia ka jingdon ki khynnah pule kiba pule shabar jong ka thain North East. U Shekhar u la iathuh ba katkum ki jingkhein kyllum ka jingdon ki samla pule ha baroh 7 tylli ki jylla kiba la don ha ka jingpule ba kham shajrong jong ki ka kot sha ka 40 haduh 60 hajar ngut.
U Mr.Mohit Kamble , na Jakran Lakr City University u la ong ba katei ka scheme na ka bynta ban ai scholarship ia ki samla pule kam shong eh tang ha ka jinglah jong ki ban pynyi ba ki dei ki khynnah kiba stad bad xkiba ioh mark heh hynrei la shim ruh ia ka jingkhein kyllum katkum ki jingtbit jong ki la ka long ha ka Sport ne kiwei pat ki jingdon sap jong ki.
Ka Skill Tree Knowledge Concortium ka dei ka lad ban air uh ka jingtip sha ki samla pule ba kin tip kumno ban ioh ia katei ka scheme , ka dei ruh ka lad ba ki samla pule kin ym mad jingeh ha ka liang ka pisa tyngka lada ki leit ban pule shabar jylla.Haba ai nuksa ia ka jingpynlut ki kmie ki kpa ki khynah kiba pule shabar u shekhar u la ong ba don kiba pynlut haduh kumba T.10 lak eiei ban pyndep ia ka Engineering katba ka jingtip kaba ki la ioh ba don kum katei ka scheme ka jinglut jong ki kan ym palat ia ka T.4 lak tyngka.
Yn sdang ban iaid ban pyntip paidbah naduh ka 1 tarik u bnai ban wan bad ruh yn pyntip paidbah ha ka website. Ki samla kiba dei ban ioh ia kane ka scheme ki hap ban pyndep ia ki jingdonkam kum ki Test bad kiwei pat. La iathuh ba ki don haduh 41 tylli ki Test Centre ha ki 7 tylli ki jylla ka thain shatei Lam Mihngi kaba don haduh 42 tylli ki jaka .
Phi don ban ong eiei?