![](https://www.urupang.com/wp-content/uploads/2024/07/image-84.png)
Shillong:Ki nongialam jong ki kynhun sengbhalang bapher bapher hapoh ka Jylla ki la iatai sani bha halor ka jingioh rung laitlan ki bar Jylla shah kane ka Jylla, bad kumjuh halor ka jingkuman ka Sorkar ia ki aiñ iada mynder, ba kynthup ka jingpyntreikam ia ka Meghalaya Residents Safety and Security Act, 2016, bad ka Inner Line Permit (ILP).
Kine ki sengbhalang kiba la shong ia ka jingïalang ha Shillong ki kynthup ia ka FKJGP, KSU, HNYF, JSU, AYWO, FAF, GSU.
U Bah Sadon Blah uba dei u President ka HNYF u la ong ba ka MRSSA baroh ka la shai namar la don ha ka ia ka khyrdop (Entry/Exit Point) bad ka District Task Force (DTF). U la ong ba ka Sorkar ka rieh shatri ha kiba bun kiba bynta, kawei ka ong ba ia ka MRSSA dang pynkylla, bad ia ka ILP pat ka ong ba kan ktah ia ka roi ka par, kan ktah ia ka kam jngohkai.
U la ong ba ka Sorkar ka la thok ia ki sengbhalang ba ia ka jaka peit bniah COVID ka ong ba kadei ka Entry bad Exit Point, bad bynrap ba mynta u Myntri Rangbah u Conrad K Sangma u ong ba ki bar Jylla kiba wan trei sha Meghalaya kim donkam ia ka Work Permit, katba ha ka MRSSA la kdew ba shwa ba ki bar Jylla kin wan trei sha kane ka Jylla ki hap ban pyni lut ia ki kot ki sla ha khyrdop Entry/Exit point ban ioh jingbit ban rung.
U Bah Sadon u la ong ba ka jingkren u Conrad ka la iatakhuh bad ka MRSSA bad kumjuh bad ka Interstate Migrants Workmen Act, u la ong ba kane ka long ka bym lah ban pdiang namar ha ka MRSSA la kdew shai ba wat ki nongwan jngohkai ruh ki hap ban pynithuh ialade ha ki entry bad exit point.
U la ong ba lada ka Sorkar ka ong ba ia ka MRSSA amendment ka dang ap ia ka muhor, dei ban pyntreikam da ka aiñ kaba la mynjur ha u 2016. U la ong ba kane ka jingleh ka Sorkar kadei kaba la shu thok bad shu pynbiej ia ki paidbah ka Jylla bad kumjuh ia ki sengbhalang.
Na ka liang u president ka KSU, u Bah Lambokstarwell Marngar u la ong ba ka MRSSA ka la dei ka aiñ naduh 2016, hynrei ia kane dang set synduk sah. U la ong ba u Myntri Rangbah u la kren kyllaiñ halor ka jingpyntreikam ia ka MRSSA, bad na ka liang ki sengbhalang ki la rai ba kin iarap ia ka Sorkar ban pyntreikam ia ka aiñ bad kin khynra ia baroh ki bar Jylla.
U Bah Dundee C Khongsit u president ka FKJGP u la ong ba ka jingkheiñsting jong ka Sorkar ka pynlong ia ki sengbhalang tied biang ia ka jingkhang ka Sorkar.
Phi don ban ong eiei?