Shillong: U para jong ka kong Agnes, u bah John F Kharshiing u la iathuh ba u Myntri rangbah ka jylla u Conrad K Sangma u la phone ban pynpaw ka jingsngewsih halor ka jingjia ia ka kong Agnes Kharshiing bad u la bthah ia ka kynhun jong u ban pyntip bad ai khubor sha u ia ka jinglong jingman ka kong Agnes hapoh jaka sumar bad u la ong ba ka sorkar kan iarap ia baroh ki jingdonkam na ka bynta ka kong Agnes.
U bah John u la ong ruh ba da ka jingtuklar jong u Shri. Ajay Singh, President, Boxing Federation of India (BFI), mynta ka sngi la don ba phone na ka ophis jong u myntri sorkar pdenguba peit ia ka koit ka khiah u Jagat Prakash Nadda ban pyntip ba katei ka ophis ka la iakren bad ki bor ka NEIGRHIMS ba kin iarap ia baroh ki jingdonkam ha ka ban sumar ia ka kong Agnes. Kumba ka long mynta u bah John u la ong ba ka kong Agnes ka dang don hapoh Critical Care Unit bad ki dang pyndait da ka lyer ring mynsiem ia ka katba ka Anita Sangma pat ka la khma ioh bor.